स्थानीय प्रशासनसँगको मिलोमतोमा नदी उत्खनन

मुकेशकुमार यादव,सिरहा । सिरहामा लकडाउनको मौका छोपी क्रसर तस्करहरुले अवैध रूपमा कमला नदीमा उत्खनन् गरिरहेको छ ।  सिरहा र धनुषाको बिच सिमामा रहेको कमला नदिबाट व्यापक उत्खनन हुन थालेपछि त्यस आसपासका बस्ति जोखिममा पर्ने संभावना बढेर गएको छ ।

सिरहाको पूर्वी तटबन्ध अन्तर्गत कर्जन्हा नगरपालिका वडा ६ अन्तर्गतको सो क्षेत्रमा विगत एक हप्तादेखि गैरकानुनी रुपमा उत्खनन् गर्दा समेत सम्बन्धित निकायले चासो नदेखाएको प्रति स्थानीय आक्रोशित भएका छन् ।  स्थानीय प्रशासनको मौन समर्थनको बाबजुद उत्खनन् गरिरहेको स्काइभेटरलाई रोक्न जाँदा ढुंगा गिट्टी उत्खनन् गर्ने तस्करहरुले लखेटेको स्थानीयको आरोप छ । स्थानीय सुरेश यादवका अनुसार नदीमा उत्खनन रोक्न प्रशासनलाई गुहार माग्दा समेत उत्खनन् रोकिएन ।

स्थानीय प्रशासनसँग तस्करहरुको मिलोमतोको कारण आफूहरु बाढीको ढुवानमा पर्ने खतरा मात्र बढेको छैन सयौं विघा खेती योग्य जग्गा बगरमा परिणत हुने उनीहरुको दुःखेसो छ । इलाका प्रहरी कार्यालय मिर्चैयाका प्रहरी निरीक्षक सन्तुलाल जयसवालले नदिमा स्काभेटर लगेको सूचना पाउनसाथ नदी उत्खनन रोकिएको दावी गरे यद्यपि संचारकर्मी नदीमा पुग्दा ठूलो संख्यामा टिफर, स्काभेटर र लोडरले गिट्टी बालुवा उत्खनन गरिरहेको देखिन्थ्यो ।

यता जिल्ला प्रशासन कार्यालय सिरहाका प्रमुख जिल्ला अधिकारी सरोजराज गुरागाईँले स्काइभेटर लगाएर उत्खनन् गर्नु नियमविपरित भएको वताउनुभयो । यद्यपि उत्खनन् हालसम्म जारी रहेको छ । सिरहा कर्जन्हा नगरपालीकाका नगर प्रमुख गंगा पासवानलाई सम्पर्क गर्दा उनीसँग सम्पर्क हुन सकेन । धनुषा तर्फका गणेशमान चारनाथ नगरपालीकाका प्रमुख रामबाबु यादवले जिल्ला विकास समितिको समन्वयमा स्काभेटर आएको बताए ।

कमला नदीको जथाभावी उत्खनन्कै कारण बेला बेलामा कमला नदीको सिरहाको तर्फको बाँध फुट्दा सिरहातर्फ जनधनको क्षति हुँदै आएको छ । जथाभावी उत्खनन्कै कारण केही वर्ष सिरहाको पूर्वी तटबन्ध अन्तर्गत भोक्राहामा बाँध फुट्दा कर्जन्हा नगरपालिका, कल्याणपुर नगरपालिका, सिरहा नगरपालिका लगायतका ठाउँहरु डुबानमा मात्र परेनन् दुई जनाले ज्यान समेत गुमाएका थिए ।