टिपरको ठक्करबाट युवकको मृत्यु भएको विरोधमा सुर्खेतमा आज तेस्रो दिन पनि प्रदर्शन चालकलाई जन्म कैद र पीडितलाई क्षतिपूर्ति दिनु पर्ने आफन्तको माग
अप्सरा बिष्ट
सुर्खेत । टिपरको ठक्करबाट युवकको मृत्यु भएको विरोधमा सुर्खेतको वीरेन्द्रनगरमा आज तेस्रो दिन पनि प्रदशन भएको छ । पीडित परिवारले संघर्ष समिति गठन गरी आन्दोलन गरेका छन् ।
प्रदशनकारीले विहान वीरेन्द्रनगर बजार बन्द गराइएका थिए भने जिल्लामा यातायातका सवारी साधन समेत ठप्प पारेका छन् । राजन सिंहको संयोजकत्वमा गठित संघर्ष समितिले टिपर मालिक र चालकलाई जन्म कैदको सजाय, पीडित परिवारलाई उचित क्षतिपूर्ति दिनु पर्ने माग गरेका छन् ।
संघर्ष समितिले माग पूरा नभएसम्म आन्दोलन जारी राख्ने बताएका छन् । मंगलबार बिहान वीरेन्द्रनगरको मुख्य सडकमा गौतम चोक नजिकै भे १ ख २२४२ नम्बरको टिपरले भे ६ प २१७८ नम्बरको मोटरसाइकललाई ठक्कर दिँदा मोटरसाइकल चालक केशर सिंहको मृत्यु भएको थियो ।
कालिकोटको महावै गाउँपालिका ३ डिल्लीकोटका सिंह सवार मोटरसाइकललाई सोही दिशाबाट आइरहेको टिपरले ठक्कर दिदा सिंहको मृत्यु भएको थियो । सिंहका परिवारले माग पूरा नभएसम्म लास नबुझ्ने अडान गरेका छन् । मंगलबारदेखि प्रशासन र परिवारबीच पटक पटक भएको वार्ताबिना निष्कर्ष टुंगिदै आएको छ ।