सिरियामा आशाको ज्योति देखियो-गुटेरेस

काठमाडौं । राष्ट्रसंघका महासचिव एन्टोनियो गुटेरेसले राष्ट्रपति बशर अल–असदको शासनको पतनपछि सिरियामा ‘आशाको ज्योति’ देखेको प्रतिक्रिया दिएका छन्। तर अगाडि महत्त्वपूर्ण चुनौती रहेको पनि उनले बताएका छन्।

‘मध्यपूर्व धेरै आगोले भष्म भइरहेको छ तर आज सिरियामा आशाको ज्योति छ र त्यो ज्योति निभ्न दिनुहुँदैन’, गुटेरेसले भने। उनले सिरियाको सैन्य पूर्वाधारमा इजरायलले गरेको व्यापक आक्रमणले सार्वभौमसत्ताको उल्लङ्घन भएको भन्दै रोक्न आह्वान गरे।

असदको सरकार पतन भएपछि इजरायलले देशको वायु सेना, नौसेना र हतियार भण्डारसहित सैन्य स्थलहरूमा हवाई आक्रमण गरेको थियो। ‘व्यापक इजरायली हवाई आक्रमण जारी छ। यी सिरियाको सार्वभौमिकता र क्षेत्रीय अखण्डताको उल्लङ्घन हुन् र यसलाई रोक्नुपर्छ’, अमेरिकी विदेशमन्त्री एन्टोनी ब्लिन्केनको अध्यक्षतामा संयुक्त राष्ट्र सुरक्षा परिषद्को बैठकअघि गुटेरेसले भने।

महासचिव गुटेरेसले अन्तर्राष्ट्रिय समुदायले सिरियामा लागु भएका प्रतिबन्ध खुकुलो पार्ने दिशामा पहिलो कदम चाल्ने सम्भावना रहेको पनि बताए। ‘त्यहाँ कम्तीमा पहिलो इशारा हुनुपर्छ-– सबै प्रतिबन्धहरू हटाउनका लागि शर्तहरू पूरा नभएसम्म सिरियाली जनतासँग एकता देखाउने पहिलो इशारा’, उनले भने।

अल–कायदामा निहित र टर्कीद्वारा समर्थित इस्लामवादी एचटिएस आन्दोलनले दमास्कसलाई तीव्र गतिमा आक्रमण गरी कब्जा गरेको थियो। एचटीएसले वर्षौँको गतिरोधपछि यस महिना शक्तिशाली असदलाई अपदस्थ गरेपछि अल्पसङ्ख्यकहरूको रक्षा गर्ने वाचा गरेको छ। तर अन्तर्राष्ट्रिय समुदाय सिरिया वा एचटिएसका सदस्यहरूमाथि लगाइएको प्रतिबन्ध हटाउन हतारमा छैनन्।

समुदायले नयाँ अधिकारीहरूले कसरी आफ्नो शक्ति प्रयोग गर्छन् भनेर पर्खिरहेका छन्।