काठमाडौं । नेपाली युवा टोलीले आज माल्दिभ्सलाई ४–० ले हराउँदै यू–२० साफ च्याम्पियनसिपमा सानदार सुरुवात गरेको छ ।
भारतको भुवनेश्वरस्थित कालिङ्गा रंगशालामा नेपालले ४२औँ मिनेटमा दीपेश गुरुङले गरेको गोलबाट अग्रता लिएको थियो । कप्तान आयुष घलानले हानेको डाइरेक्ट फ्री किकलाई माल्दिभ्सका गोलकिपर शाइहान अलीले पन्च गरेर बचाएका थिए । तर, रिबाउन्डमा प्राप्त बललाई दीपेशले झण्डै २५ यार्डबाट हानेको सशक्त प्रहार गोलमा परिणत भएको हो ।
५८औँ मिनेटमा सुगम सुवालले नेपालको अग्रता दोब्बर बनाए । सुगमले काउन्टर अट्याकमा गोल गरेका थिए । उनले वान भर्सेस वानुमा दोस्रो बार च्यापेर हानेको प्रहारलाई माल्दिभ्सका गोलकिपरले रोक्न सकेनन् ।
६१औँ मिनेटमा कृतिशरत्न छुन्जुले तेस्रो गोल थपे । नेपालका कप्तान आयुषलाई माल्दिभ्सका हुसैन शाभिनले फाउल गरेपछि नेपालले पेनाल्टी अवसर पाएका थिए । उक्त अवसरलाई कृतिशरत्न छुन्जुले कुनै गल्ती नगरी गोलमा परिणत गरेका हुन् ।
इन्जुरी समयमा वैकल्पिक खेलाडी मनग्य नकर्मीले अर्को गोल थपेका हुन् । कृतिशरत्नको स्थानमा ८३औँ मिनेटमा मैदान छिरेका मनग्यले रिबाउन्डमा प्राप्त बलमा गोल गरेका हुन् ।
प्रतियोगितामा नेपालले दोस्रो खेल श्रीलंकासँग साउन ११ गते, भारतसँग साउन १५ र बंगलादेशसँग साउन १७ गते खेल्नेछ ।
राउन्ड रोबिन लिगपछि तालिकाको शीर्ष दुई टोलीबीच अगस्ट ५ मा फाइनल खेल हुनेछ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
