जनकपुर आँखा अस्पतालको व्यवस्थापनका कारण बिरामीलाई सास्ती

धनुषा ।
जनकपुरधामस्थित जानकी आँखा अस्पतालमा व्यवस्थापन पक्षको कमजोरी तथा आन्तरिक किचलोका कारण उपचारकालागि आउने बिरामीको संख्यामा कमी आएको छ । अस्पताल यन्त्र, भौतिक संरचनादेखि व्यवस्थापकीय दृष्टिकोणले धारासायी हुँदै गईरहेको बेला अस्पताल परिसर बाहिर चश्मा तथा औषधीका व्यवसायीहरु जानकी आँखा अस्पताल सुधार संघर्ष समिति गठन गरेर आन्दोलित नै बनेका छन् ।

संघर्ष समितिले अस्पतालमा दक्ष मेडिकल डाइरेक्टर नभएकै कारण अस्पताल दिन प्रतिदिन धारासायी हुँदै गईरहेको आरोप लगाउदै आन्दोलन थालेको हो । अस्पतालको मेडिकल डाइरेक्टर एमडी हुनुपर्ने प्रावधान रहेपनि डिप्लोमा डिग्री मात्रै योग्यता रहेका हेमशंकर झा भनसुनका आधारमा वर्षौदेखि मेडिकल डाइरेक्टर पोस्टमा रहँदै आएको आरोप समितिको छ ।

यता,मेडिकल डाइरेक्टर झाले आफूमाथि संघर्ष समितिले लगाएको आरोपहरु निराधार रहेको बताउछन् । उनी आफू मेडिकल डाइरेक्टर बन्नका लागि पैरवी नगरेको बरु व्यवस्थापन समितिले नै पटक पटक आफूलाई आग्रह गरेको र आफू कन्ट्रयाक्टको आधारमा अस्पताललाई सेवा प्रदान गर्दै आएको बताउँछन् ।

जानकी आँखा अस्पतालमा ८० प्रतिशत नेपाली बिरामीहरु र २० प्रतिशत भारतीय बिरामीहरु जाँच गराउँदै आईरहेका छन् । सन १९८२ मा स्थापना भएको यस अस्पतालमा दैनिक ४ सय देखि ५ सयसम्म बिरामीले ओपिडी सेवा र ४० देखि ५० जना बिरामीले सर्जरी सेवा लिदै आएका छन् । तर अस्पतालका प्राय चिकित्सकहरुले भने भिठामोड नाकामा अस्पतालकै नाउँमा निजि क्लिनक संचालन गर्दै आरोप पनि छ ।

उनीहरुले आफ्नो निजि क्लिनीकमा समेत आँखा अस्पतालकै लेटर पैडको प्रयोग गर्दै आईरहेको छन् । यस आरोपलाई स्वीकार गर्दै मेडिकल डाइरेक्टर झाले समस्या समाधानका लागि चाँडै पहल गर्ने प्रतिवद्धता त गरे तर भताभुङग भएको अस्पत्तालको व्यवस्थापन गर्दै विरामीलाई उचित सेवा दिन भने अस्पत्राललाई समय लाग्ने देखिन्छ ।