पर्यटन वर्षलाई लक्षित गर्दै इलाममा होम स्टे संचालन

इलाम,
नमिन दहाल
इलाममा पर्यटन बर्षलाई लक्षित गरी होमस्टेहरु बन्न थालेका छन् । भ्रमण बर्ष २०२० कालागी होमस्टे संचालनमा सरकारी निकायको सहयोग पाएपछि स्थानियहरुले होमस्टे संचालन गर्न शुरु गरेका हुन् ।
इलामको विकट क्षेत्र मानिएको देउमाई नगरपालिकाको सिद्धथुम्का र सन्दकपुर गाउँपालिकाको जमुनामा होमस्टे संचालनमा आएका छन् । प्रदेश सरकारको ७५ प्रतिशत र २५ प्रतिशत स्थानियको लागतमा मंसिरबाट सिद्धिथुम्काका दश घरमा होमस्टे संचालन भएका छन् । प्रदेश सरकार तथा पर्यटन बोर्डको सहयोग पाएपछि होमस्टेमा सेवा सुविधा विस्तार गरिएको छ । होमस्टे खुलेसँगै पर्यटकहरुलाई आर्कषण बढाउन सुरु गरिएको छ ।
यसअघि जिल्लाको श्रीअन्तु, दोवाटे –चोयाटार क्षेत्रमा होमस्टे दर्ता गरेर सञ्चालन भएका छन् । होमस्टेको सेवाले ग्रामिण तथा स्थानीय स्तरमा स्वरोजगार विकासको अवसर पनि दिएको छ । इलामको सिद्धिथुम्का चुलीबाट सूर्योदय र सूर्यास्तको दृश्यमा आगन्तुकहरुको आर्कषण भएपनि बस्न समस्या भएको थियो । होमस्टे संचालन भएपछी बस्नेको समस्या समाधान हुने भएको छ ।

प्रदेश सरकारको अनुदानलाई प्रभावकारी रुपमा उपयोग गर्नका लागी सरकारले जारी गरेको होमस्टे संचालन कार्यविधी २०६७ अनुसार होमस्टे सन्चालन भएका छन् । होमस्टेमा स्थानिय परिकारलाई पहिलो प्राथमिकतामा राखिएको छ । सुनसान गाउँहरुमा होमस्टे भएपछी आन्तरीक तथा बाह्रीय पर्यटकको चहलपहल बढेको छ । होमस्टेमा आउने पाहुनाहरुको स्वागत, सत्कार, खानपीन, र सांस्कृतिक कार्यक्रमका लागि स्थानीयहरु व्यस्त भएका छन् । होमस्टे संचालनमा आएपछी स्थानीयको जीविकोपार्जनमा समेत टेवा पुग्ने देखिएको छ ।