डान्स बारमा मेयर पक्राउ परेपछि

कञ्चनपुर।

कञ्चनपुरको महेन्द्रनगरस्थित एक डान्स बारबाट मेयर सहित केहि व्यक्तिहर्रु पक्राउ परेका छन् ।

नेपाली कांग्रेसबाट मेयरमा निर्वाचित दार्चुला शैल्यशिखर नगरपालिकाका मेयर अमरसिंह धामी महेन्द्रनगरस्थित ब्लू डान्स बारबाट पक्राउ परेका हुन् ।

डान्स बारमा मदिरा पिएर हो–हल्ला गरेपछि मेयर धामीसहित केही व्यक्तिलाई प्रहरीले पक्राउ गरेको हो । आइतबार राति वडा प्रहरी कार्यालय महेन्द्रनगर र जिल्ला प्रहरी कार्यालय कञ्चनपुरको टोलीले मेयर धामी सहित केही युवतीलाई पक्राउ गरेको जनाएको छ ।
डान्स बारमा काम गर्ने केही युवतीले आफूमाथि दुव्यवहार भएको भन्दै प्रहरीलाई सम्पर्क गरेपछि प्रहरीको टोली डान्स बार पुगेको थियो । वडा प्रहरी कार्यालयका एक प्रहरी कर्मचारीका अनुसार प्रहरीको टोली डान्स बार पुग्दा दुवै पक्षबीच विवाद चलिरहेको थियो ।

प्रहरीको टोलीले डान्स बारमा विवाद गर्ने व्यक्तिलाई पक्राउ गरेर केहीलाई जिल्ला प्रहरी कार्यालय र केहीलाई वडा प्रहरी कार्यालय पु¥याएको थियो । प्रहरीले नियन्त्रणमा लिएपछि धामीले आफू जनप्रतिनिधि भएको भन्दै आफूलाई तत्काल रिहा गर्न प्रहरी कर्मचारीलाई नै चेतावनी दिएका थिए ।

आइतबार राति पक्राउ परेका धामी सोमबार बिहान नै रिहा भइसकेका छन्।
प्रहरीले भन्यो, ‘डान्स बारमा दुई समूहबीच विवाद भएको र एउटा समूहले मेयर धामीलाई पनि बोलाएको रहेछ ।

विवाद मिलाउन भनेर उहाँ डान्स बार पुगेको जानकारीमा आएको छ। दार्चुलाको शैल्यशिखर नगरपालिकाका मेयर धामीको कञ्चनपुरको भीमदत्त नगरपालिकामा समेत घर छ । पक्राउ परेको विषयमा जानकारी लिन खोज्दा मेयर धामीसँग भने सम्पर्क हुन सकेको छैन ।