भ्रमण वर्षको मुलुकभर भव्य रूपमा शुभारम्भ गरिँदै

काठमाडौं ।

नेपाल भ्रमण वर्ष २०२० आज भव्य रुपमा शुभारम्भ गरिँदैछ । मुलुकमा २० लाख पर्यटक भित्र्याउने र पर्यटकलाई अर्थतन्त्रको मुख्य अंगका रुपमा स्थापित गर्ने उदेश्यले नेपाल भ्रमण वर्ष २०२० तय गरिएको हो । सिंगो देश भ्रमण वर्षको आयोजक बनेको छ ।

एक वर्षको निरन्तर प्रयास र एक सय भन्दा बढी स्वदेशी तथा विदेशी निकायसँगको छलफल तथा सहकार्यपछि भ्रमण वर्ष शुभारम्भ तयारी पूरा भएको हो । पर्यटकलाई बिशेष अनुभव गराउन लाइफटाइम एक्सपेरेन्स’ भन्ने नारासहित भ्रमण वर्ष मनाइँदैछ । भ्रमण वर्षको लोगोसहित यस बीचमा थुप्रै कार्यक्रम भइसकेका छन् ।

अंग्रेजी नयाँ वर्षको अवसर पारेर दशरथ रंगशालामा नेपाल भ्रमण वर्ष २०२० शुभारम्भ कार्यक्रम तयारी गरिएको हो । भ्रमण वर्षको शुभारम्भ राष्ट्रपति विद्यादेवी भण्डारीबाट गर्ने कार्यक्रम छ । कार्यक्रममा प्रधानमन्त्री केपी ओली सम्बोधन गर्नुहुनेछ ।

राष्ट्रपति र प्रधानमन्त्रीले नेपाल भ्रमण वर्ष २०२० र अंग्रेजी नयाँ वर्षको अवसरमा छुट्टाछुटै शुभकामना दिनुभएको छ । शुभकामना सन्देशमा मुलुकको विकास र समृद्धिमा एक जुट हुन सबैलाई आव्हान गरिएको छ ।

कार्यक्रममा छिमेकी मुलुक भारत र चीनबाट मन्त्रीस्तरीय प्रतिनिधि सहभागी हुनेछन् । छिमेकी मुलुकका पाहुना कार्यक्रममा सहभागी हुन काठमाडौंमा आइसकेका छन् । कार्यक्रममा वैदिक मन्त्रोच्चारणका साथै १ सय ८ वाद्ययन्त्र बजाइनेछ । नेपालको सभ्यता र संस्कृति झल्काउने झाकी समेत प्रस्तुत गरिनेछ । समारोहमा सामाजिक संघ संस्था, नेपाल प्रहरी, सशस्त्र प्रहरी, नेपाली सेना लगायतले मार्चपास गर्नेछन् । कार्यक्रम १८ देशका ३५ सञ्चारमाध्यमले विशेष रुपमा प्रचार गर्नेछन् ।

भ्रमण वर्ष २०२० लाई मुलुकभर ‘राष्ट्रिय उत्सवको रुपमा मनाइँदैछ । प्रदेश सरकारले पनि भ्रमण वर्षलाई बिशेष उत्सवको रुपमा मनाउँदैछ । ७ वटै प्रदेश राजधानीमा मुख्यमन्त्रीबाट पर्यटन भ्रमण वर्ष शुभारम्भ गर्ने कार्यक्रम छ । विदेशस्थित नेपाली कूटनीतिक नियोगमा समेत भ्रमण वर्ष भव्य रूपमा मनाउने कार्यक्रम छ । विदेशमा जनवरी ७ मा भ्रमण वर्ष शुभारम्भ गर्ने कार्यक्रम छ ।

पर्यटन विकासका लागि सन् २०२० लाई प्रस्थान विन्दु र २०३० सम्मको अवधिलाई पर्यटन दशक अभियानको रुपमा मनाइउने सरकारको योजना छ । भ्रमण वर्षले राष्ट्रिय एकता र जनताबीच सुमधुर सम्बन्ध बनाई सुखी नेपाली समृद्ध नेपालको परिकल्पना सफल बनाउन सार्थक हुने विश्वास लिइएको छ ।