राप्रपाले २९७ औं पृथ्वी जयन्ती भब्य रूपमा मनाउने

काठमाडौं । राप्रपाले हरेक वर्ष झैं यसपटक पनि २९७ औं पृथ्वी जयन्ती तथा राष्ट्रिय एकता दिवसको अवसरमा चियापान कार्यक्रमको आयोजना गरेको छ ।

राजधानीको नेपाल पुलिस क्लबमा आयोजना गरिएको चियापानका लागि प्रधानमन्त्री, विभिन्न राजनीतिक दलका नेताहरू, उपप्रधानमन्त्रीहरु, मन्त्रीहरु, संवैधानिक अङ्ग र सुरक्षा निकायका प्रमुखहरु, निजामती सेवाका वरिष्ठ अधिकारीहरु, विदेशी कुटनैतिक नियोगका प्रमुखहरु, उद्योगी, व्यबसायी, बुद्धिजीवी, पत्रकार, नागरिक समाज, पेशागत संघसंस्था र सामाजिक जीवनका लब्ध प्रतिष्ठित व्यक्तिहरुलाइ निमन्त्रणा गरिएको राप्रपाले जनाएको छ ।

राप्रपाले नेपालीलाई नाम र पहिचान दिने राष्ट्र निर्माता पृथ्वीनारायण शाहको राष्ट्र निर्माणमा भएको योगदानको उच्च सम्मान गर्न माग गरिरहेको छ । गत पौष ४ गते बसेको पार्टीको केन्द्रीय कार्यसम्पादन समितिको बैठकले पृथ्वी जयन्ती तथा राष्ट्रिय एकता दिवसलाई पर्वको रुपमा मनाउन र सो दिन सार्वजनिक बिदा दिन पनि सरकारसंग माग गरेको छ ।

यसैगरी नेपाली नोटमा राष्ट्र निर्माताको तस्बिर अंकित गर्न पनि राप्रपाले माग गरेको छ । हरेक वर्ष झैं उल्लासमय ढंगबाट पृथ्वी जयन्ती मनाउन राप्रपाले पार्टीका उपाध्यक्ष बुद्धिमान तामाङको संयोजकत्वमा पृथ्वी जयन्ती समारोह समिति नै गठन गरेको छ । यसैगरी राप्रपाको विभिन्न जिल्ला समिति, भातृ संगठन र विभागले विविध कार्यक्रम गरि पृथ्वी जयन्ती मनाउने तयारी गरिरहेको छ ।

विद्यार्थी संगठनले क्याम्पसहरुमा पृथ्वीनारायण शाहको योगदान बारे चर्चा गर्न र युवा पुस्ता माझ छलफल चलाउन अन्तरक्रिया कार्यक्रमको आयोजना गरेको छ, यसैगरी कला साहित्य विभागले कवि गोष्ठी, ट्रेड युनियनले रक्तदान र सम्पूर्ण भातृ संगठनले संयुक्त रुपमा प्रवचन गोष्ठीको आयोजना गरेको छ ।

राप्रपाले यसपटक अध्यक्ष कमल थापाको नामबाट दश हजार निमन्त्रणा कार्ड वितरण गरेको छ । राप्रपाले २०६६ सालदेखि हरेक वर्ष पौष २७ गते पृथ्वी जयन्ती तथा राष्ट्रिय एकता दिवसको अवसरमा चियापान आयोजना गर्ने गरेको छ ।