डडेल्धुरापनि विमानस्थल निर्माणका लागि सम्भाव्यता अध्ययन सुरु

प्रकाश विसी,
२९ पुस, डडेल्धुरा ।
सुदुरपश्चिम प्रदेशमा विमानस्थल नभएको जिल्लाका रुपमा रहेको डडेल्धुरामा विमानस्थल निर्माणका लागि संभाव्यता अध्ययन सुरु भएको छ । सुदुरपश्चिम प्रदेशका ९ जिल्ला मध्ये ८ जिल्लामा यसअघि नै विमानस्थल निर्माण भइसकेका छन् भने वन्द रहेका विमानस्थलहरु पुनः निर्माणको क्रममा छन् ।
डडेल्धुरा जिल्लामा प्रारम्भिक अध्ययन पश्चात विमानस्थलको सम्भाव्यता अध्ययन सुरु भएको छ । डडेल्धुरा जिल्लाको अजयमेरु गाउँपालिका १ को पुइलेक देखि वयलडाँडा सम्मको १२ सय मिटर क्षेत्रमा सम्भाव्यता अध्ययन सुरु भएको हो । संस्कृति, पर्यटन तथा नागरिक उड्डयन मन्त्रालयले सम्भाव्यता अध्ययनका लागि पठाएको प्राविधिक टोलीले सम्भाव्यता अध्ययनका रुपमा स्थलगत निरीक्षण गरि लम्बाइ चौडाइ लिनुका साथै ड्रोन क्यामरा मार्फत उक्त क्षेत्रको नक्सा लिएको छ । स्थानीयमा पनि लामो समयदेखि चर्चामा रहेका स्थानमा फेरी अध्ययन सुरु भएपछि अब विमानस्थल बन्ने आशा जागेको छ ।

संम्भाव्यता अध्ययन गरिएको क्षेत्रको भू–वनोट लगायत ल्याण्डिङ र टेकअफ गर्ने बेलाका लागि अपटिकल लिमिटेसन लगायतका कुराहरुलाई हेर्दा पहाडी जिल्लाका लागि उपयुक्त स्थान रहेको अध्ययन टोलीले जनाएको छ । २०७० सालबाट डडेल्धुरामा विमालस्थल निमार्णका लागि विभिन्न स्थानमा माग भइरहेको भएपनि अहिले आएर पुइलेकमा प्रारम्भिक अध्ययन पश्चात सम्भाव्यता अध्ययन सुरु भयो
। तर, यसको पूर्ण निश्र्कष आउन ३ महिना लाग्नेछ । यसअघि पुईलेक संगै डडेल्धुराको बिरादे, दहभेटा, डाँडाबन क्षेत्रमा पनि प्रारम्भिक अध्ययन भएको थियो । बिरादेमा बिमानस्थलका लागि आवश्यक धावन मार्गको लम्बाई नपुगेको, दह भेटामा पर्याप्त क्षेत्रफल नभएको, र डाँडाबनमा धावन मार्गका लागि पर्याप्त क्षेत्रफल रहेको भएपनि धावन मार्ग पहाडले छेक्ने सम्भावना रहेको प्रारम्भीक अध्ययन टोलीले जनाएको थियो । पुईलेकमा अध्ययन गरिए अनुसार विमानस्थलका लागि आवश्यक धावन मार्गको लम्बाई, पर्याप्त क्षेत्रफल पाइएको छ ।
विमानस्थल निर्माणका लागि डडेल्धुराको पुइलेकमा कालोपत्रे सडक पहुँच भएकाले ४ वर्षको समयावधि लाग्न सक्ने प्राविधिक टोलीले देखाएको छ । विमालस्थल अध्ययन भइरहेको क्षेत्र डडेल्धुरा सदरमुकाम बाट १२ किलोमिटर टाढा पर्छ ।