सुदूरपश्चिममा जनता आवास कार्यक्रमको बजेट कार्यान्वयनमै ढिलाई

जनता आवास कार्यक्रम अन्तरगत कैलाली र कञ्चनपुरमा चालु वर्षको बजेट कार्यान्वयन गर्न ढिलाई भएको छ। लोपोन्मुख तथा विपन्न समुदायका लागि घर निर्माण गर्ने भन्दै लागु भएको जनता आवास कार्यक्रम अन्तरगत चालु वर्षको बजेट कार्यान्वयन गर्न ढिलाई भएको हो।

प्रदेशको भौतिक पुर्वाधार विकास मन्त्रालयले बजेटको ढिलोगरी अख्तियारी दिएपछि घर निर्माणको कार्यलाई निरन्तरता दिन समय लागेको दावी कार्यक्रम कार्यान्वयन गर्ने निकायको छ। तर कैलाली र कञ्चनपरका लाभग्राहीले भने गत वर्षकै भुक्तानी पुर्ण रुपमा नपाएको गुनासो गरेका छन्।

लोपोन्मुख तथा विपन्न समुदायका लागि घर निर्माण गर्ने भनिए पनि भुक्तानी दिन लापरवाही भईरहेको आरोप कैलालीका लाभग्राही भरत दासको छ। ‘लामो संघर्षपछि घर त निर्माण भयो तर भुक्तानी पाउन निकै समस्या भईरहेको छ।’ उनले भने। ‘अब हामीले भुक्तानी लिन कता जाने कुनै अत्तोपत्तो छैन्।’

तर चालु वर्षको बजेट कार्यान्वयन गर्न अहिले सुपरिवेक्षण भईरहेको दावी प्रदेशको भौतिक पुर्वाधार विकास मनत्रालय मातहतको सहरी विकास तथा भवन कार्यालयको छ। उक्त कार्यालयका अनुसार अहिले कैलाली र कञ्चनपुरका लाभग्राहीको घरको अनुगमन भईरहेको जनता आवास कार्यक्रमकी सुपर भाईजर भावना थापाले बताईन्।

‘कतिपय स्थानमा मापदण्ड अनुसार घर निर्माण नहुने गरेको पाइएका कारण भुक्तानी पनि ढिलाई भएको हो।’ उनले बताईन्। जनता अवास कार्यक्रम अन्तरगत चालु वर्षमा मात्रै क्रमागतका लागि कैलालीमा दुई करोड ५९ लाख र कञ्चनपुरमा चार करोड १० लाख बजेट आएको छ।

उक्त बजेट भित्र कैलालीमा तीन सय ४१ र कञ्चनपुरमा तीन सय ७१ घर निर्माणको योजना रहेको सहरी विकास तथा भवन कार्यालयका धनगढीका प्रमुख ईन्द्रबहादुर स्वारले बताए। कार्यक्रम अन्तरगत गत वर्ष मात्रै कैलालीमा ७१ र कञ्चनपुरमा एक सय घर निर्माण गरिएको उनले बताए।