सुमन केसी
१२ माघ, दाङ । कुसुन्डा भाषाकी एकमात्र जानकार ज्ञानीमैया कुसुन्डाले संसार छाडेकी छिन् । लामो समयदेखि दमको रोगले ग्रसित कुसुन्डाको लमही नगरपालिका ६ कुलमोहर घरमा ८५ वर्षको उमेरमा निधन भएको हो ।
एक साता अगाडि उनलाई विरामी भएपछि परिवारले कोहलपुर अस्पतालमा ४ दिन भर्ना गरेर घरमा ल्याएका थिए । आर्थिक अभावका कारणले उपचार गर्न समस्या भएपछि भाषाविद् उदय आलेले उनलाई लमहीको फ्लोरेन्स अस्पतालमा उपचारका लागि पहल गरेका थिए । अस्पतालले पनि उपचार हुन नसक्ने भन्दै उनलाई घर फिर्ता गरेको थियो । घरमै रहेको अवस्थामा शनिवार १२ वजे उनको निधन भएको वुहारी आशा पुनले वताइन् ।
कुसुन्डा नेपालको लोपोन्मुख जातिमा पर्दछ । नेपालमा यो जातिका मानिसको संख्या करिव ३ सय भएपनि कुसुन्डा भाषा जान्नेमा ज्ञानीमैया एक्ली थिइन् । शरीरले साथ नदिदा पनि उनले विभिन्न ठाउँमा गएर कुसुन्डा भाषाको प्रशिक्षण दिने गरेकी थिइन् । कुसुृन्डा भाषा जान्ने नयाँ मान्छे कोही पनि नथपिदा उनी निकै निराश हुने गरेकी थिएन् । कुसुन्डा भाषा वोल्न जान्ने नयाँ मान्छे उत्पादन गर्ने उनको ठूलो सपना रहेको पनि वुहारी आशाले. वताइन् । उनका १ छोराको ६ वर्ष अगाडि माछा मार्ने क्रममा खोलामा करेन्ट लागेर मृत्यु भएको थियो भने दुइ छोरीको विहान भइसकेको छ । उनी वुहारी र नातिनासँग कुलमोहर गाउँमा वस्दै आएकी थिइन् । उनका लागि सरकारले घर समेत वनाइदिएको थियो ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
