इटहरी ।विराटनगरस्थित कोशी अस्पतालमा कोरोना संक्रमित चिकित्सक, नर्स र कर्मचारीको संख्या दिनदिनै बढेको छ । मंगलबारसम्मा कोशी अस्पतालमा संक्रमितको संख्या १ सय ३३ पुगेको अस्पतालका निमिक्त मेसु डा. लक्ष्मीनारायण यादवले जानकारी दिए ।
उनका अनुसार संक्रमित हुने २४ जना डाक्टर, ४२ जना स्टाफ नर्स, ११ जना प्यारामेडिक्स, ७ जना प्याथालोजिस्ट, ४ जना डेन्टलका स्वास्थ्यकर्मी र ३६ जना कार्यालय सहयोगीमा संक्रमण देखिएको जानकारी दिए ।
अस्पतालमा कोरोना संक्रमणको अवस्था भयावह रहेको छ । कोशीमा प्रदेश १ र २ का बिरामी उपचारका लागि आउने भएकाले तिनै बिरामी उपचारका क्रममा चिकित्सक र नर्सहरू संक्रमित भएको अस्पतालले जनाएको छ ।
संक्रमित चिकित्सक, नर्स र कर्मचारी होम आइसोलेसनमा रहेको उनले बताए । बिरामी उपचारमा संलग्न चिकित्सक, नर्स र कर्मचारीहरू संक्रमित भएपछि ओपिडी, वार्ड, शल्यक्रिया, शिक्षण, अनुसन्धान र दैनिक गतिविधिमा असर परेको छ ।
अस्पतालमा कार्यरत चिकित्सकहरू नै धमाधम संक्रमित हुन थालेपछि सेवा प्रवाह कठिन भएको यादवको भनाइ छ । ‘संक्रमितमध्ये ४ जना चिकित्सक पुनः काममा फर्केकाले सेवा प्रवाहमा केही राहत भएको छ,’ उनले भने, ‘चिकित्सकमा संक्रमण दर यस्तै रह्यो र सरकारले दरबन्दीअनुसारको चिकित्सक तथा स्वास्थ्यकर्मी नपठाए सेवा ठप्प हुने अवस्था आउने देखिन्छ ।’
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
