धनगढीमा दोश्रो नगरस्तरीय राष्ट्रपती रनिङ्ग सिल्ड प्रतियोगिता सुरु

कृत विष्ट

धनगढी । धनगढी उप–महानगरपालिकाले आयोजना गरेको दोश्रो नगरस्तरीय राष्ट्रपती रनिङ्ग सिल्ड प्रतियोगिता शुक्रवार देखि धनगढीमा सुरु भएको छ ।
धनगढी रंगाशालामा सुरु भएको दोश्रो नगरस्तरीय राष्ट्रपती रनिङ्ग सिल्ड प्रतियोगिताको धनगढी उप–महानगरपालिकाका प्रमुख नृपबहादुर वडले उद्घाटन गरेका थिए । प्रतियोगिताको उद्घाटन गर्दै नगरप्रमुख वडले दोश्रो नगरस्तरीय राष्ट्रपती रनिङ्ग सिल्ड प्रतियोगिताका साथै नगरले हरेक वडामा खेलकुदका कार्यक्रमहरु गर्दै आईरहेको बताए । धनगढी खेलकुदका क्षेत्रमा देशमै राम्रो स्थानमा रहेको छ नगरप्रमुख वडले भने, यस्तै खेलकुदका गतिविधीहरुबाट नै खेलाडी जन्माउने हो ।
नगरप्रमुख वडले खेलाडी भएको समाज अनुशासित हुने भएकाले हरेक समाजमा खेलाडीहरुको उपस्थीति हुनुपर्ने बताए । धनगढी उप–महानगरपालिकाका प्रमुख प्रशासकिय अधिकृत नारायण प्रशाद सापकोटाले धनगढी उप–महानगरपालिकाले खेलकुदका क्षेत्रमा ठूलो लगानी लगाईरहेको बताए । वडाहरुमा धामाधम खेल मैदान निर्माण गर्न थालिएको छ प्रमुख प्रशासकिय अधिकृत सापकोटाले भने, बिभिन्न खेलमा प्रतियोगितात्मक कार्यक्रम पनि आयोजना गर्दै आएको छ । धनगढी उप–महानगरपालिका शिक्षा तथा खेलकुद महाशाखाका प्रमुख बिष्णु प्रसाद कोईरालाले खेलकुद प्रतियोगितालाई भब्य बनाउन आग्रह गरे ।
नगरखेलकुद विकास समितिका अध्यक्ष दिपक थापाले नगरक्षेत्रमा २२ वटा विद्यालयहरुले सहभागिताका लागि नाम दर्ता गराएको बताए । उनले भने, खेल तीन दिन सम्म चल्ने छ ।