बुटवल । सटर व्यवसायीले अटेर गरेपछि लुम्बिनी प्रादेशिक अस्पताल बुटवलका व्यवसायिक सटर डोजर लगाएर भत्काईएका छन् ।
जिल्ला अदालतको आदेश पछि ४८ घण्टे अल्टिमेट दिएको अस्पताल प्रशासनले आज बिहान ६ बजेबाट भत्काउन सुरु गरेको हो । पटक–पटक सूचना जारी गरेर सटर खाली गर्न अनुरोध गरेपनि व्यवसायीले अटेरी गरेपछि अस्पताल विकास समितिले बिहीबार बिहानै डोजर चलाएको हो । ५ नम्बर प्रदेश सरकारले अस्पतालका आसपास रहेका सबै सटरहरु हटाएर पर्खाल लगाई प्रादेशिक अस्पतालाई गौरवको योजनाका रुपमा विकास गर्ने योजना अगाडि बढाएको छ । गत कार्तिक १८ गते प्रदेश मन्त्रिपरिषद् बैठकले अस्पतालका सटर मंसिर मसान्तसम्म खाली नगरे डोजर लगाएर खाली गर्ने निर्णय गरेको थियो ।
सटर हटाएर आकर्षक पर्खाल बनाउने र विशिष्टिकृत सेवासहितको अस्पताल बनाउने प्रदेश सरकारको लक्ष्य रहेको बताउँदै आएको छ । अस्पतालको पुर्व र उत्तरतर्फ ७३ वटा सटरमा निजि मेडिकल तथा अन्य पसलहरु संंचालनमा रहेका थिए । अस्पताल विकास समितिले सटर खाली गर्न पटकपटक समयसिमा दिएपनि व्यवसायीहरु अदालत गएका कारण सटर खाली हुन सकेका थिएनन् । उता लुम्बिनी प्रादेशिक अस्पतालका सटर व्यवसायीहरूले आफूहरूलाई राज्यले अन्याय गरेको गुनासो गर्दै आएका छन् ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
