झापाको कुकुर बनेपा लगेर उपचार, खर्च एक लाख

झापा । कुकुर झापाको उपचार भने काभ्रेपलाञ्चोकको बनेपामा हुन्छ भन्ने सुन्दा अचम्म लाग्न सक्छ । झापाका एक जना पशुप्रेमीले पालेको कुकुरलाई बनेपामा ल्याएर नियमित उपचार गराइरहेका छन् । झापा बिर्तामोडका विनोद बस्नेतले आफूले पालेको कुकुरको उपचार गराउन झापाबाट बनेपा ल्याउने गरेका बताएका छन् ।

सामान्य बिरामी परेमा पशु प्राविधिकसँग फोनबाटै परामर्श लिने गरे पनि पशु अस्पतालमा राखेर उपचार गराउनु परे पहिला पनि बस्नेतले कुकुर काठमाडौं ल्याउने गरेका थिए । नियमित उपचार गराउने पेट केयरको शाखा बनेपामा नै भएकाले केही महिनादेखि भने उनले कुकुरको नियमित स्वास्थ्य परीक्षण बनेपाबाटै गराउन थालेका हुन् ।

घरमा पालेको डोबरम्यान जातिको कुकुर दुई महिनाअघि मोटरसाइकलको ठक्करबाट घाइते भएपछि बस्नेतले बनेपा ल्याएका हुन् । उपचार प्रक्रिया आजसम्म जारी छ । ठक्करबाट कुकुरको पछाडिको खुट्टाको हड्डी भाँचिएको थियो । कुकुर घाइते भएपछि बस्नेतले सुरुवाती उपचार झापामै गराएका थिए । झापामा थप उपचार सम्भव नदेखेपछि उनले कुकुरको उपचार गराउन बनेपामा ल्याएका हुन् ।

डुर्नो नामकरण गरिएको कुकुरको खुट्टाको एक्स-रेमा हड्डीको शल्यक्रिया गर्नुपर्ने देखिएपछि अहिले काभ्रेपलाञ्चोकको बनेपामा रहेको बनेपा पेट कियरमा राखेर उउपचार भइरहेको छ । कुकुरको उपचारमा अहिलेसम्म एक लाख रुपियाँभन्दा बढी रकम खर्च भएको बस्नेतले बताए । दुई महिनादेखि निरन्तर अस्पताल भर्ना गराएर उपचार गराउँदा निकै खर्च भएको उनको भनाई छ ।