काठमाडौँ । यतिवेला युवराज्ञी हिमानी शाह गोरखामा हुनुहुन्छ । युवराज्ञी हिमानी शाह हिमानी ट्रष्टले गरेको गोरखा र लमजुङका विद्यार्थीलाई शैक्षिक सामाग्री वितरण गर्ने कार्यक्रममा सहभागी हुन बिहीबार काठमाडौँबाट लमजुङ जानु भएको हो ।
हिजो भदौ २४ गते लमजुङमा कार्यक्रम राखिएको थियो भने आज भदौ २५ गते गोरखामा कार्यक्रम राखिएको छ। लमजुङको बेंसीसहर–७ स्थित आमा समूह भवनमा बिहान ११ बजेदेखि मर्स्याङ्दी गाउँपालिका, दुधपोखरी गाउँपालिका र दोर्दी गाउँपालिकाका ९७ विद्यालयका २ हजार ९५२ बालबालिकालाई कापी, कलम, टिफिन बट्टा, पानीको बोत्तल, झोला लगायतका सामग्री हस्तान्तरण गरिएको हो। जसमा १ हजार ४६९ छात्र र १ हजार ४६३ छात्रा रहेको ट्रष्टले जनाएको छ ।
यस्तै आज गोरखा बजारको शक्ति माध्यमिक विद्यालयमा बिहान ११ बजे विभिन्न गाउँपालिकाका गरी १ हजार ८ सय ८९ छात्र र १ हजार ८ सय ६५ छात्रालाई शैक्षिक सामाग्री प्रदान गरिने छ।
ट्रष्टले लमजुङ र गोरखामा गरी साढे ६ हजारभन्दा बढी विद्यार्थीलाई स्टेशनरी सामाग्री वितरण गरेको छ । ट्रष्टले यसरी नै दुर्गम क्षेत्रका बालवालिकालाई पढाइमा सहयोग पुगोस् भनेर शैक्षिक सामग्री वितरण कार्यक्रम आयोजना गर्दै आएको छ । युवराज्ञी गोरखाको कार्यक्रम सकेर आजै काठमाडौं फिर्ता हुने कार्यक्रम छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
