काठमाडौं । प्रधानमन्त्री पुष्पकमल दाहाल प्रचण्डले कम्बोडियामा आगलागीमा परेर ज्यान गुमाएकाहरूप्रति दुःख व्यक्त गरेका छन्।
प्रधानमन्त्री प्रचण्डले बिहीबार राति भएको आगलागीमा झापा बिर्तामोड नगरपालिका १ का निराकर पाण्डेसहित १९ जनाको निधनप्रति दु:ख व्यक्त गरेका हुन्।
उनले निधन भएका पाण्डेको परिवारप्रति गहिरो समवेदना प्रकट गरेका छन्। मुख्यसचिव शंकरदास वैरागीलाई उनको शव नेपाल ल्याउन शीघ्र सहजीकरण गर्न सम्बन्धित निकायलाई परिचालन गर्न पनि निर्देशन दिएको प्रचण्डको सचिवालयले जनाएको छ।
कम्बोडियाको एक होटलमा भीषण आगलागीमा परी पाण्डेको स्थानीय समयअनुसार बिहीबार राति ११ बजेदेखि लागेको आगोमा परी मृत्यु भएको हो। भिजिट भिसामा एक महिनाअघि कम्बोडिया गएका उनी बसेको होटल क्यासिनोमा आगो लागेपछि पाण्डेले १२ औं तलाबाट हाम फालेका थिए।
आगलागी सुरु भएपछि उनले घरमा फोन गरेर परिवारका सदस्यसँग कुराकानी गरेका थिए। आगलागीबाट बच्न नसक्ने निष्कर्षमा पुगेपछि उनले आफ्नो परिवारका सदस्यलाई भिडियो सन्देश पठाएका थिए।
घटनाक्रम र वस्तु परिस्थितिलाई हेर्दा पाण्डेले जलेर मर्नुभन्दा आखिर हाम फालेर मर्ने निर्णय लिएको देखिन्छ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
