काठमाडौँ : धरान उपमहानगरपालिकाका मेयर हर्कराज राईले धरानमा खानेपानी व्यवस्थापनका लागि करिब ५ अर्ब लाग्ने र बजेटमार्फत स्रोत व्यवस्था गर्ने प्रधानमन्त्रीको आश्वासन पाए पनि बजेटले सम्बोधन नगरेसम्म विश्वास नलाग्ने बताएका छन्।
सोमवार सिंहदरबारमा प्रधानमन्त्री केपी शर्मा ओलीसँगको भेटपछि पत्रकारसँग उनले यस्तो बताएका हुन्। उनले धरानको जनताका लागि मुख्य समस्या खानेपानी रहेको र यसबारे प्रधानमन्त्रीसँग भएको कुराकानी सकारात्मक भएको बताए।
प्रधानमन्त्रीको आश्वासनमा शंका गर्न नहुने तर बजेटले सम्बोधन नगरेसम्म विश्वास नलाग्ने उनको भनाइ छ। उनले धरानमा आफूले ३ हजार धारा थपिसकेको तर शहरीकरण बढ्दा माग पनि उत्तिकै बढेको बताए।
मेयर राईले जीवन रहेसम्म समस्याले नछोड्ने भन्दै मुख्य समस्या समाधान पहिलो प्राथमिकतामा राख्नुपर्ने बताए। काठमाडौँवासीले नियमित मेलम्चीको पानी खान नपाएको भन्ने पत्रकारको जिज्ञासामा उनले श्रमदान गर्न म आउनु पर्यो कि भन्दै व्यङ्ग्य गरे।
प्रतिक्रिया दिनुहोस
Copyright © 2019 / 2025 - Kalapanimedia.com All rights reserved
