सदर चिडियाखाना २६ वर्षमा, थप व्यवस्थित बनाउन महानगर प्रमुख महर्जनको आग्रह

काठमाडाैं । राष्ट्रिय प्रकृति संरक्षण कोष सदर चिडियाखानाले २६ औं वार्षिकोत्सव मनाएको छ।कोषले बुधबार ललितपुरमा एक कार्यक्रमको आयोजना गरेर सदर चिडियाखानाको २६ औं वार्षिकोत्सव मनाएको हो। कार्यक्रममा बोल्दै ललितपुर महानगरपालिकाका मेयर चिरिबाबु महर्जनले ललितकलाले भरिएको ललितपुरमा नेपालको एक मात्रै चिडियाखाना हुनु ललितपुरको विशेषता भएको बताए। 

उनले चिडियाखाना ललितपुर महानगरको एउटा विशेषता नै भएको बताएका छन्। मेयर महर्जनले चिडियाखानाको थप व्यवस्थित रुपमा विकास गर्नु पर्ने आवश्यकता रहेको बताए। उनले विकास गर्न सकिन भने पनि जुन रुपमा चलेको छ त्यही रुपमा राख्न सक्नु पर्ने बताए। 

मेयर महर्जनले भने,‘ ललितपुर महानगरपालिका ललित कलाले भरिएको सम्पदा सहर हो। यही महानगरमा देशको एउटा मात्रै चिडियाखाना पर्छ। चिडियाखानले ललितपुर महानगरको शिर उच्च बनाएको छ। चिडियाखानामा काठमाडौं आउने मानिसहरु सायदै नआउने कमै हुन्छन्। जसलाई चिडियाखानाको बारेमा थाहा नभएकाहरु मात्रै आउँदैनन्। चिडियाखाना ललितपुर जिल्लाकै विशेषता हो।

यति महत्वपूर्ण चिडियाखाना ललितपुर महानगरमा हुनु भनेको एकदमै ठूलो उपलब्धी हो। तर, यसलाई सरकारले बचाइ राख्नु जरुरी छ। चिडियाखानालाई सकिन्छ धेरै व्यवस्थित रुपमा विकास गरौं। सकिँदैन भने पनि जुन गतिमा चलिरहेको छ त्यहि रुपमा रहन दिनुपर्छ। यसलाई लोप हुन दिनु हुँदैन भन्ने उदेश्य सरकार तथा महानगरले लिन जरुरी छ। महानगरले चिडियाखाना अगाडिको फुटबल मैदानमा ठूला ठूला कन्सट हुने गरेका थिए त्यसलाई हटाउन सफल भएका छौं। चिडियाखानामा भएका जनावरलाई असर पर्ने भएकाले हटाएको हौं। यसले पनि चिडियाखानालाई व्यवस्थित बनाउँदै जानुपर्छ। चिडियाखानामा ठूला ठूला भवनहरु बन्नु हुँदैन खुल्ला छाड्नु पर्छ।’

कार्यक्रममा राष्ट्रिय प्रकृति संरक्षण कोषका अध्यक्ष डा. कृष्णप्रसाद ओलीले चिडियाखाना मुख्य चार वटा उदेश्यले सञ्चालन भइरहेको बताए। उनले कोषले जङ्गली जनावरको विषयमा शिक्षा दिने काम गर्ने गरेको बताए। ओलीले कोषले जङ्गली जनावर तथा प्रकृति संरक्षणको विषयमा नेपालको १३ जिल्लामा पाठ्यपुस्तकमा समावेश गराएको बताए।

डा. ओलीले भने,‘ चिडियाखानाको मुख्य चार वटा उद्देश्य रहेको छ। जसमा सबै मानिहरु जङ्गलमा जान सक्दैनन्। जङ्गली जनावरसँग घुलमिल हुन पनि पाउँदैनन्। चिडियाखानामा जङ्गली जनावरको बारेमा चिनाउनको लागि अर्थात शिक्षा दिन तयारी गरिएको हो। यसमा चाहिने कुराहरु विद्यालयका पाठ्य पुस्तकमा समेत समावेश गर्नु पर्छ।

राष्ट्रिय प्रकृतिक संरक्षण कोषले नेपालका १३ जिल्लाका पाठ्य पुस्तकमा समावेश गरिहेको छ। पछिल्लो समय आएका नयाँ प्रविधि र जलवायु परिर्वतनको विषयमा पाठ्यपुस्तकमा समावेश गराएर शिक्षा दिनु जरुरी रहेको छ। यी लगायत अन्य धेरै काम गरिरहेको छ।’२६ औं वार्षिकोत्सवको अवसरमा कोषले चिडियाखाना काम गर्ने उत्कृष्ट कर्मचारीहरुलाई सम्मान तथा प्रमाणपत्र वितरण समेत गरेको छ।