चलेको छ हुरी आज, कति लाई उडाउछ
चलेको छ हुरी आज,
कति लाई उडाउछ ।
कोपिला कति झर्ने हुन,
कति फूल चुडाउछ ।।
बेमौसमी हुरी हो यो,
कोरोना जीव घातक ।
धर्मात्मा र धनी देखि,
छोड्दैन नीच पातक ।।
बिरक्ती भाव झल्किन्छ,
बासन्ती पनमा पनि ।
बिरही गीत पोख्दैछ,
कोयली बनमा पनि ।।
कान्ति र लालिमा छैन,
न्यास्रा मुहार छन् सबै ।
सान्त्वना मात्र मिल्दैछ,
माग्ने गुहार छन् सबै ।।
कबड्डी कुर्सी कै देख्छु,
यो महामारिमा पनि ।
छुट्टै हुरी चलेको छ,
बालुवाटारमा पनि ।।
कालापानी लिपुलेकमा,
चल्यो दक्षिणको हुरी ।
मुखमा राम बोलेर,
बोकी धोतीमुनी छुरी ।।
निरन्तर चलेकै छ,
भ्रष्ट आचरको हुरी ।
रोकिएला कहिले कुन्नी,
नेताजी को चुरी फुरी ।।
एकदिन अवस्य हट्नेछ,
तुवाँलो यो बिकृतिको ।
महामारी पनि हट्छ,
माया गरे प्रकृतिको ।।
गुमेको भूमि मिल्नेछ,
देश भक्त अघि सरे ।
राष्ट्रिय ध्वज बोकेर,
सिमामा पहरा गरे ।।
- अधिवक्ता जगतप्रकाश जोशी