नेपालले नक्सा पारित गरेर वार्ताको वातावरण बिगार्‍यो -भारत

काठमाडौं । नेपालले शनिबार लिम्पियाधुरा, लिपुलेक र कालापानी समेटेर जारी गरेको नक्सालाई निशान छापमा राख्‍नका लागि गरेको संविधान संशोधनप्रति भारतले आपत्ति जनाएको छ ।
भारतीय विदेश मन्त्रालयले एक विज्ञप्ति जारी गर्दै नेपालले नयाँ नक्साका विषयमा संविधान संशोधन गरेर सीमा क्षेत्रका बाँकी मुद्दाहरूको बारेमा वार्ता गर्नु वर्तमान समझदारीको पनि उल्लंघन गरेको आरोप लगाएको छ ।

भारतको विदेश मन्त्रालयका प्रवक्ता अनुराग श्रीवास्तवले जारी गरेको विज्ञप्तिमा भनिएको छ, ‘नेपालको प्रतिनिधिसभाले नयाँ नक्सालाई परिवर्तनका लागि संविधान संशोधन विधेयक पारित गरेको छ । जसमा भारतीय भूभाग समेटिएको छ । हामीले यस विषयमा हाम्रो पोजेसिन यसअघि स्पष्ट पारेका छौं ।’

ूभूभागको कृत्रिम विस्तार गरी गरिएको दाबी कुनै ऐतिहासिक तथ्य वा प्रमाणमा आधारित छैन र यो मान्य छैन, विज्ञप्तिमा भनिएको छ, ‘यसले हाम्रो सीमा क्षेत्रका बाँकी विवादलाई समाधान गर्न वार्ता गर्ने वर्तमान समझदारीको उल्लंघन गरेको छ ।’

८ मेमा भारतीय रक्षामन्त्री राजनाथ सिंहले नेपालको भूमि लिपुलेक हुँदै मानसरोवर जाने सडक उद्‌घाटन गरेपछि २० मेमा नेपालले नयाँ नक्सा जारी गरेको थियो । नेपालले जारी गरेको उक्त नक्सा स्वीकार्य नहुने भन्दै भारतले आपत्ति जनाएको थियो ।

यसअघि भारतले नेपाली भूमि लिपुलेक, कालापानी र लिम्पियाधुरा समेटेर ३ नोभेम्बर, २०१९ मा नयाँ राजनीतिक नक्सा जारी गरेको थियो । भारतले जारी गरेको उक्त नक्साप्रति नेपालले आपत्ति जनाउँदै वार्ताका आह्‍वान गरेको थियो । भारतले वार्ताका लागि गरेको नेपालको प्रस्तावको कुनै जवाफ दिएको थिएन ।