कोरोनाका कारण नेपालमा थप ६ जनाको मृत्यु

कोरोना भाइरस संक्रमणका कारण मृत्यु हुनेक्रम दैनिक बढ्न थालेको छ । आज मात्रै ललितपुरको पाटन अस्पतालमा उपचाररत एक जना कोरोना भाइरस संक्रमितको मृत्यु भएको छ । मृतक जनकपुरकी ३८ वर्षीया महिला हुन् ।

यही साउन १८ गते उनी पाटन अस्पतालमा भर्ना भएकी थिइन् । स्वास्थ्य कार्यालय ललितपुरले उनको मृत्यु भएको पुष्टि गरेको छ । यस्तै, ललितपुरस्थित किष्ट मेडिकल कलेजमा कोरोना संक्रमित ७६ बर्षीय महिलाको मृत्यु भएको छ । यस्तै, कोरोना विशेष अस्पताल बुटवल धागो कारखानामा दुई जनाको मृत्यु भएको छ ।

मृत्यु हुनेमध्ये एकजना कोरोना भाइरसको संक्रमण पुष्टि भएका व्यक्ति हुन् भने अर्का व्यक्तिको पीसीआर रिपोर्ट आउन बाँकी छ । कोरोना भाइरसको लक्षण देखिएर अस्पतालमा भर्ना गरिएका कपिलवस्तुका २५ र ४२ वर्षिय पुरुषको मृत्यु भएको लुम्बिनी प्रादेशिक अस्पतालले जनाएको छ ।

मृत्यु हुनेमध्ये एकजना कपिलवस्तु तौलिहवाका हुन् भने अर्का व्यक्ति कृष्णननगरका हुन् । यस्तै, सप्तरी र सुनसरीमा थप दुई जना कोरोना संक्रमितको मृत्यु भएको छ । गएराती डाक्नेश्वरी नगरपालिका वडा नम्बर ८ घर भई राजविराज वडा नंबर ६ बस्दै आएका ७५ वर्षीय बृद्धको मृत्यु भएको हो ।

चार दिनदेखि ज्वरो आएपछि कोरोना परीक्षण गर्दा उनको रिर्पोट पोजेटिभ आएको थियो । त्यस्तै यता, सुनसरीको धरानस्थित विपी कोइराला स्वास्थ्य विज्ञान प्रतिष्ठान अस्पतालमा आज कोरोना संक्रमणबाट थप एक जनाको मृत्यु भएको छ ।

मोरङको बुढिगंगाा गाउँपालिका २ का ५५ बर्षिय पुरुषको उपचारका क्रममा मृत्यु भएको हो । यस्तै, जनकपुरधामका पूर्व मेयर कृष्ण गिरीको पनि कोरोना संक्रमणबाट मृत्यु भएको छ । काठमाडौंको मेडिसिटी अस्पतालमा उपचाररत उनको मंगलवार राति निधन भएको हो।