कांग्रेस महाधिवेशन निर्धारित मितिमा महाधिवेशन हुने संभावना तिब्र

काठमाडौं । नेपाली कांग्रेसमा संस्थापन र रामचन्द्र पौडेलबीच सहमति भएसंगै निर्धारित मितिमा महाधिवेशन हुने संभावना तिब्र बनेको छ ।

पार्टी सभापति शेरबहादुर देउवा र वरिष्ठ नेता रामचन्द्र पक्षबीच हिजो निर्वाचन निर्देशिका संशोधन, क्रियाशील सदस्यहरुको नामावली सार्वजनिक र उम्मेदवारहरुको मापदण्डलगायतका विषयमा सहमति भएको हो ।

यस्तै ६ हजार ७ सय ४३ वडामा एकै दिन अधिवेशन गर्ने सहमति पनि भएको छ । सहमतिलगत्तै पार्टी मूख्यालयमा केही दिन यता भईरहेको जिल्ला सभापतिहरुको रिले अनसन पनि हिजो रातीबाटै तोडिएको छ । यस्तै हिजो रातीसम्ममा ५३ जिल्लाका क्रियाशील सदस्यको नामावली प्रकाशित गरिसकिएको छ ।

केन्द्रीय निर्वाचन समितिले निर्वाचन निर्देशिका बमोजिम हिजो थप पाँच जिल्लाको नामावली प्रकाशित गरेको हो । नुवाकोट, धादिङ, चितवन, ललितपुर र अर्घाखाँचीका क्रियाशील सदस्यको नामावली सार्वजनिक गरिएको निर्वाचन समितिका संयोजक महादेवप्रसाद यादवले जानकारी दिनुभयो ।

उहँका अनुसार क्रियाशील सूची सार्वजनिक भइसकेका जिल्लामा निर्वाचन अधिकृत पनि खटाइसकिएको छ । कांग्रेसले यही भदौ १८ गते देशैभर वडा अधिवेशन गर्ने बताएको छ । कांग्रेसलाई भदौ २३ भित्रै वडा अधिवेशन गर्नुपर्ने बाध्यता छ । त्यसपछि अधिवेशन सुरु गर्दा वैधानिकताको प्रश्न उठ्ने भएकोले कांग्रेसले भदौ १८ मै वडा अधिवेशन गर्न लागेको हो ।

कांग्रेसको केन्द्रीय महाधिवेशन भने मंसिर ९ देखि १३ गतेसम्म काठमाडौंमा हुनेछ । कांग्रेसमा यसपटक ९ लाखभन्दा बढी क्रियाशील सदस्य छन् । क्रियाशील सदस्यको सूचीमा जिल्ला सभापतिकै नाम नभेटिएको गुनासो समेत आउन थालेका छन् ।