नेपालमा कोरोना संक्रमण बढ्यो,रुपन्देहीको सीमा नाकामा कडाइ

रविन्द्र गुप्ता, भैरहवा । कारोना जोखिम बढेपछि रुपन्देहीको सीमा नाकामा कडाइ गरिएको छ । भारतबाट स्वदेश फर्किने नागरिकमा कोराना (कोभिड) संक्रमण पुष्टी हुन थालेपछि चेकजाँचमा कडाइ गरिएको हो ।

कोरोना संक्रमण नियन्त्रण तथा रोकथामका लागि सीमा क्षेत्रमा नियमित चेकजाँचलाई बढाइएको रुपन्देहीका प्रमुख जिल्ला अधिकारी भरतमणी पाण्डेले बताए । उनले विशेष गरी भारतमा लामो समयसम्म बसेका र भारतीय पर्यटकलाई लक्षित गर्दै चेकजाँचको दायरा बढाइएको जानकारी दिए । ‘चेकजाँचका क्रममा संक्रमित फेला परेमा संक्रमितलाई गन्तव्यसम्म पुर्याउने र ट्याकिङ गर्ने तथा एक व्यक्तिबाट अर्को व्यक्तिमा सर्न नदिन विशेष सावधानी अपनाउन अनुरोध गरेका छौं, ’प्रजिअ पाण्डेले भने । भारतमा संक्रमण फैलिरहेकाले सीमा नाकामा स्वास्थ्य जाँचमा कडाइ गरिएको उनको भनाइ छ ।

स्वास्थ्य कार्यालय, रुपन्देहीका प्रमुख गौरव ढकालले हेल्थ डेस्कमार्फत निगरानी बढाइएको बताए । उनले हेल्थ डेस्कमा स्वास्थ्य परीक्षण गर्ने र संक्रमित पुष्टि भए सुरक्षित ढंगले घरसम्म पुर्याइएको बताए । ‘भारतसँग जोडिएका सीमा नाकामा परीक्षण गर्दा स्वदेश फर्किएकामा संक्रमण देखिन थालेपछि चेकजाँच र निगरानी बढाइएको उनले बताए । परीक्षणको दायरा बढाएका छौं, एक व्यक्तिबाट अर्को व्यक्तिमा सर्न नदिन परामर्श पनि दिएका छौं, ’ढकालले भने ।

यसैबीच रुपन्देहीका प्रमुख जिल्ला अधिकारी भरतमणी पाण्डे, रुपन्देही प्रहरी प्रमुख (एसपी) भरत बहादुर वि.क., स्वास्थ्य कार्यालय रुपन्देहीका प्रमुख गौरव ढकाललगायतले बेलहिया हेल्थ डेस्कको अनुगमन गर्दै त्यहाँको अवस्थाबारे जानकारी लिएका छन् ।

सोक्रममा प्रजिअ पाण्डेले कोभिड-१९ को संक्रमण बढ्न नदिन अनिवार्य रुपमा स्वास्थ्य मापदण्ड पालना गर्नुपर्ने बताए । उनले स्वास्थ्य परीक्षणको दायरालाई बढाउन स्वास्थ्यकर्मीहरुलाई निर्देशन दिए । भारतदेखि आउने पर्यटकहरूसँग पीसीआर रिपोर्ट माग्ने र नभएमा अनिवार्य रुपमा एन्टिजेन परीक्षण गर्न निर्देशन दिइएको छ । पछिल्लो समय नेपालमा कोरोना संक्रमण बढ्दै गएको छ ।