कञ्चनपुर । हिजो कञ्चनपुरमा नियन्त्रणमा लिइएको बाघलाई ललितपुरमा रहेको सदर चिडियाखानामा राखिने भएको छ ।
शुक्लाफाँटा राष्ट्रिय निकुञ्जका सहायक संरक्षण अधिकृत रोशन ठगुन्नाले कञ्चनपुरको बेलौरी नगरपालिकाबाट नियन्त्रणमा लिइएको बाघलाई चिडियाखानामा राखिने जानकारी दिनुभयो । हामीसँग यहाँ खोरमा राख्न पर्याप्त स्रोत साधन नभएको र बाघले भविष्यमा थप मानवीय क्षति गर्न सक्ने भएकाले चिडियाखाना लगिन लागेको हो ।
बाघले आक्रमण गर्दा अस्ति शुक्रवार बेलौरी पचुईमा घाँस काटिरहेकी ४२ वर्षीया गङ्गा चन्दको ज्यान गएको थियो । चन्दसँगै घाँस काट्न गएका अन्य चार–पाँच महिलाले भागेर ज्यान जोगाएका थिए । बर्दियाबाट बाघविज्ञ डा. दिनेश देवकोटा नेतृत्वको टोलीले हिजो बिहान बाघ नियन्त्रणमा लिएको थियो।
ज्यान गुमाएकी महिलाको परिवारलाई राहत दिने निकुञ्जले जनाएको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
