नागरिकता खारेजीको माग गर्दै प्रशासनमा उजुरी

रौतहट । फर्जी कागजात पेश गरेर नेपाली नागरिकता लिएको भन्दै जिल्ला प्रशासन कार्यालय रौतहटमा उजुरी परेको छ।

जिल्लाको वृन्दावन नगरपालिकाबाट एक जना भारतीय नागरिकले फर्जी कागजात पेश गरेर नेपाली नागरिकता लिएको भन्दै जिल्ला प्रशासन कार्यालय रौतहटमा उजुरी परेको हो।

वृन्दावन नगरपालिका वडा नं.६ सखुवाह धमौराबाट भारतीय नागरिक मोहमद तैयवले नेपाली नागरिकता लिएको भन्दै स्थानीय बासिन्दाले जिल्ला प्रशासन कार्यालय गौरमा उजुरी दिएका हुन्। भारतीय नागरिकले झुठो विवरण पेश गरेर नेपाली नागरिकता लिएको भन्दै स्थानीय मोबारक मियाँ कवाडीले जिल्ला प्रशासन कार्यालय गौर रौतहटमा उजुरी दर्ता गराएका छन्।

भारतको बिहार राज्यअन्तर्गत पूर्वी चम्पारण जिल्ला ग्राम जुवाफर वडा नं—१ मा स्थायी बसोवास भएका रजक मियाँको छोरा वर्ष ४१ को मोहमद तैयवले झुठा विवरण पेश गरेर नेपाली नागरिकता लिएको भन्दै जिल्ला प्रशासन कार्यालयमा उजुरी परेको हो।

२०६४ साल वैशाख १४ गते गाउँमा खटिएको टोली प्रमुख नवराज चापागाँईले तैयवलाई नेपाली नागरिकता दिएको देखिन्छ। उनले नेपाली नागरिकता लिएको भए पनि हाल उनीसँग भारतीय नागरिकतासँगै भारतको रासन कार्ड र भोटिङ आईडी सबै रहेको उजुरीमा उल्लेख छ।

उनको मात्र नभएर उनकी श्रीमती र बाबुसमेत भारतीय नागरिक रहेको र उनीमाथि हदैसम्मको कारवाहीको माग गर्दै जिल्ला प्रशासन कार्यालय रौतहटमा उजुरी परेको छ। जिल्ला प्रशासन कार्यालय रौतहटले तैयवको नागरिकताको बिषयमा छानबिन सुरु गरेको बताएको छ।