काठमाडौं । सरकारले रुसी सेनामा नेपाली युुवा भएको तथ्यांक नभएको जनाएको छ । बिहीबार मन्त्रिपरिषद्को निर्णय सार्वजनिक गर्ने क्रममा सरकारका प्रवक्ता सूचना तथा सञ्चारमन्त्री रेखा शर्माले रुसी सेनामा नेपाली युवा रहेको तथ्यांक नभएको बताएकी हुन् ।
सञ्चारमन्त्री शर्माले युद्धग्रस्त क्षेत्रमा नेपाली युवालाई जान रोक लगाएको बताउँदै भनिन्, ‘युद्धग्रस्त देशहरुमा नेपाली युवाहरु विभिन्न तरिकाले जाने भएकाले त्यो सरकारलाई थाहा हुने कुरा भएन । रुसी सेनाको बारेमा पहिला पनि कुरा आएका थिए । त्यहाँ नेपाली युवाको मृत्यु भयो भन्ने कुरा आएको छ । यो बियषमा हामी सबै संवेदनशिल छौँ ।’ उनले यसबारे सरकारले पनि अब तथ्यांक राख्नुपर्ने धारणा राखिन् ।
सञ्चारमन्त्री शर्माले नेपाली युवाहरु विभिन्न दलालहरुमार्फत् प्रलोभनमा परेर रुसी सेनामा भर्ती हुने गरेको बताइन् । ‘युद्धग्रस्त क्षेत्रमा पुगेका युवाहरुबारे घटना घटिसकेपछि खबर आउने गरेका छन्’ उनले भिनन्, ‘तर, यसबारेमा सरकारले खोजबिन गर्नुपर्छ । तथ्यांक पनि राख्नुपर्छ । तर, मुल कुरा यसरी प्रलोभवनमा परेर युद्धग्रस्त क्षेत्रमा जानु हुन्न भन्ने कुरा हामीले हाम्रो युवाहरुलाई भन्नुपर्छ भन्नेमा सरकार सचेत छ ।’
गैरकानूनी रुपमा युवाहरु रुसी सेनामा गएको भएकाले सरकारले तथ्यांक राख्न नसकेको उनको भनाइ छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
