काठमाडौं । नेपाल आयल निगमका कार्यकारी निर्देशक उमेशप्रसाद थानीले राजीनामा दिएका छन् ।
आज दिउँसो उद्योग वाणिज्य तथा आपूर्तिमन्त्री रमेश रिजाललाई भेटेर उनले राजीनामापत्र बुझाएका हुन्। थानीले राजीनामाको कारण भने खुलाएका छैनन् । आफूसँगको भेटमा भने व्यक्तिगत कारण उल्लेख गरेका मन्त्री रिजालले जानकारी दिए। उनको राजीनामा भोलि स्वीकृत गर्ने मन्त्री रिजालले बताए।
तीन वर्षका लागि नियुक्त भएका उनी २१ महिनामै राजीनामा दिएका हुन् । उनको कार्यकाल अझै १५ महिना बाँकी नै छ । थानी खुल्ला प्रतिस्पर्धाबाट २०७८ फागुनमा शेरबहादुर देउवा प्रधानमन्त्री हुँदा निगमको कार्यकारी निर्देशक पदमा नियुक्त भएका थिए।
थानीका पालामा नेपाल आयल निगम ऋणमुक्त भएको छ । सक्रिय राजनीतिमा जानका लागि राजीनामा दिएको हुन सक्ने निगम स्रोतले जनाएको छ । उनी नेपाली कांग्रेस निकट इन्जिनियरहरुको संस्था सेन्टर फर डेमोक्रेटिक इन्जिनियर्स (सिडेन)का निवर्तमान अध्यक्षसमेत हुन्।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved