काठमाडौं महानगर र क्रिकेट सङ्घको सहकार्यमा प्रशिक्षक प्रशिक्षण शुरु

काठमाडौं । काठमाडौँ महानगरपालिकाले बागमती प्रदेश क्रिकेट संघको सहकार्यमा क्रिकेट खेल प्रशिक्षक प्रशिक्षण शुरु गरेको छ।

गत भदौ २९ गते महानगर र सङ्घबीच भएको सम्झौताअनुसार सोमवार शुरु भएको प्रशिक्षणमा सामुदायिक ९सरकारी० विद्यालयका माध्यमिक तहका खेल शिक्षक र प्रतिनिधिलाई प्रशिक्षणमा सहभागी गराइएको महानगरका सूचना अधिकारी वसन्त आचार्यले जानकारी दिए।

प्रशिक्षणमा ५० जना क्रिकेट प्रशिक्षकलाई तालिम दिइ उनीहरूमार्फत खेलाडीलाई सीप सिकाउनु उद्देश्य रहेको महानगरको भनाइ छ।

‘प्रशिक्षणमा सैद्धान्तिक कक्षासहित एम्बेसी पार्कमा प्रयोगात्मक प्रशिक्षण हुनेछ। साथै सैद्धान्तिक कक्षामा प्रशिक्षकको भूमिका, शारीरिक तन्दुरुस्ती, निर्णायक, ब्याटिङ, बलिङ, विकेटकिपिङबारे जानकारी दिइनेछ,’ आचार्यले भने।

उनीहरुलाई राष्ट्रिय खेलकुद परिषद्का प्रशिक्षक अनिल अधिकारी, क्रिकेट प्रशिक्षक ९लेभल–३० राजु बस्नेत, लेभल–२ का प्रशिक्षकहरु कलाम अली, मनोज कटुवाल, रिकेश लामा, सुजन महर्जन, निर्णायक विनय झालगायतले प्रशिक्षण दिनेछन्।

प्रशिक्षणसँगै संघले वडा स्तरमा ‘क्रिकेट नेट’ राख्न तीन महिनाभित्र प्राविधिक सहयोग उपलब्ध गराउनेछ। यसका लागि महानगरले १० लाख रुपैयाँ उपलब्ध गराउनेछ। यसरी उपलब्ध गराइने रकम काम थालनी भएपछि ४० प्रतिशत र बाँकी प्रगतिका आधारमा उपलब्ध गराइनेछ।

अनुगमन तथा मूल्याङ्कन समिति वा खटाइएका कर्मचारीले सम्पादित कार्यको समय(समयमा अनुगमन तथा मूल्याङ्कन गर्ने व्यवस्था गरिएको छ।

चालु आर्थिक वर्षमा महानगरले एक टोल एक खेलकुद पूर्वाधार निर्माण तथा समग्र खेलकुद क्षेत्र विकासका लागि स्वर्णिम योजनासहितको कार्यक्रम सञ्चालन गर्नका लागि १० करोड ५० लाख रुपैयाँ विनियोजन गरेको छ।

एक वडा एक नमूना उद्यान कार्यक्रम सञ्चालन गर्न १ करोड रुपैयाँ विनियोजन गरेको छ।

महानगरले चालु आर्थिक वर्षमा विशेष महत्वका साथ १० वटा विषयगत क्षेत्रका गौरवका योजना छनोट गरेको छ। त्यसका लागि ३ अर्ब ८० करोड रुपैयाँ र २५ स्वर्णिम योजनाका लागि २ अर्ब रुपैयाँ विनियोजन गरिएको छ।