सुमन भट्ट, कन्चनपुर । प्रशासन कार्यालय कञ्चनपुरले महेन्द्रनगरको महेन्द्र स्मरक आसपासका क्षेत्रमा एक साताका लागि निषेधाज्ञा लगाएको छ। यहाँ पाँच जनाभन्दा बढीलाई भेला हुन रोक लगाइएको प्रमुख जिल्ला अधिकारी गोपालकुमार अधिकारीले बिहीबार जारी गरेको आदेशमा उल्लेख छ।
यस क्षेत्रमा एक सातासम्म जुलुस, प्रदर्शन, धर्ना, घेराउ गर्न निषेध गरिएको प्रशासनको भनाइ छ।
भीमदत्त नगरपालिका वडा नम्बर ४ मा रहेको महेन्द्र स्मरण र त्यहाँबाट दशरथ चन्दको सालिकसम्मको मुख्य सडकमा निषेधित क्षेत्र तोकेको हो। त्यस्तै महेन्द्र स्मरणबाट पश्चिम मदन भण्डारीको सालिक सम्मको मुख्य सडक खण्ड क्षेत्रसम्म पनि निषेधित क्षेत्र घोषणा गरेको छ ।
महेन्द्र स्मरण आसपासको क्षेत्रमा राजा महेन्द्र शाहको सालिक स्थापना गर्न दिने/नदिने भन्नेबारे विभिन्न राजनीतिक दलहरूबीच विवाद भएपछि सार्वजनिक स्थानमा शान्ति कायम गर्न उक्त स्थानलाई निषेधित क्षेत्र तोकेको प्रमुख जिल्ला अधिकारी अधिकारीले बताए ।
राप्रपाले राजा महेन्द्रको सालिक पुनःस्थापना गर्न खोजेको थियो। अध्यक्ष राजेन्द्र लिङ्देनसहित नेताहरूले सभा गर्दै बिहीबार राजा शाहको सालिक स्थापना गर्ने कार्यक्रम तय थियो।
तर, राप्रपाले कार्यक्रम सुरू गर्नुअघि नै प्रशासनले निषेध क्षेत्र घोषणा गरेको हो ।
यता प्रशासन र सात दलको निर्णयप्रति राप्रपा मात्रै होइन महेन्द्रनगरका स्थानीयले पनि निन्दा गरेका छन । जसको देन हो तिनैलाई निशेध गरिनु बिडम्बना भएको उनिहरुको तर्क छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved