काठमाडौं । आईसीसी यू–१९ विश्वकपअन्तर्गत पहिलो खेलमा नेपाललाई न्युजिल्यान्डले ३ सय ३ रनको कीर्तिमानी लक्ष्य प्रस्तुत गरेको छ। नेपालका लागि यो कुनै पनि टिमले दिएको सर्वाधिक ठूलो लक्ष्य हो।
टस जितेर पहिले ब्याटिङ गरेको न्युजिल्यान्डका लागि स्नेहिथ रेडीले जारी प्रतियोगिताकै उच्च १ सय ४७ रनको शानदार शतकीय अविजित इनिङ खेलेपछि नेपालले विशाल लक्ष्य पाएको हो। एक समयमा ६७ रन जोड्दा तीन विकेट लिएको नेपाल त्यसपछि भने ‘ब्याक फुट’मा धकेलियो। क्रिजमा रेडी र कप्तान ओस्कार ज्याक्सनले सानदार साझेदारी गर्दै न्युजिल्यान्डलाई उच्च स्कोरमा पुर्याउन सफल भएका थिए।
यी दुईबीच चौथो विकेटका लागि १ सय ५७ रनको साझेदारी भएको थियो। कप्तान ज्याक्सन ७५ रनमा आकाश त्रिपाठीद्वारा बोल्ड हुँदा साझेदारी तोडिएको थियो। तर न्युजिल्यान्डले त्यसपछि पनि विकेट पतन भए पनि उसले रन निरन्तर जोड्दा विशाल लक्ष्य बनाउन सफल भयो। उसका लागि रेडीले १ सय २५ बल खेल्दै ११ चौका र ६ छक्काको सहयोगमा १ सय ४७ रनको नटआउट इनिङ खेले। त्यस्तै, ज्याकसनले ८१ बलमा ७५ रन बनाए। थप दोहोरो स्कोरका रुपमा टोम जोनेसले ३३ रन बनाउँदा लुके वाट्सनले १४ रन बनाए।
त्यस्तै, एलेक्स थोम्सनले १३ रन बनाएका थिए। अन्य खेलाडीले भने दोहोरो रनको स्कोर बनाएनन्। तर रेडी र कप्तान ज्याक्सनकै स्कोर नेपालका लागि चुनौतीपूर्ण बन्यो। नेपालका लागि सुभाष भण्डारीले ३ विकेट लिँदा गुल्सन झाले २ विकेट लिए। त्यस्तै, दिपेश कँडेल, तिलक भण्डारी र आकाश त्रिपाठीको नाममा समान १–१ विकेट रह्यो।
यू–१९ विश्वकप इतिहासमा न्युजिल्यान्डसँग नहारेको नेपाल केही समयपछि जवाफी ब्याटिङका लागि मैदान उत्रिँदै छ। नेपालले यसअघि २००६ र २०१६ मा न्युजिल्यान्डलाई पराजित गरेको थियो। यो दुई देशबीचको तेस्रो भेट हो।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved