कैलालीमा थप एक जनामा कोराना संक्रमण भेटियो

कैलाली । कैलालीमा थप एकजना कोरोना संक्रमित भेटिएका छन्। जिल्लाको लम्कीचुहा नगरपालिका वडा नम्बर १ मा ६० वर्षीया महिलामा कोरोना पोजेटिभ देखिएको हो।

लम्कीचुहा बहुमुखी क्याम्पसको क्वारेन्टाईनमा राखिएकी ती महिलाको ¥यापिड टेष्टमा नेगेटिभ देखिएपनि राष्ट्रिय जनस्वास्थ्य प्रयोगशाला काठमाडौँमा परिक्षण गर्दा पोजेटिभ देखिएको छ।

उनी परिवार सहित विरगञ्जबाट फर्किएको बुझिएको बताउँदै लम्कीचुहा अस्पतालका प्रमुख डाक्टर प्रकाश तिमिल्सिनाले एम्बुलेन्स मार्फत सेती प्रादेशिक अस्पताल पठाईरहेको बताए। यो सँगै कैलालीमा कोरोना संक्रमितको संख्या पाँच पुगेको छ।

यसअघि दुबईबाट आएका धनगढीका युवक, उनकी भाउजु, भारतबाट फर्किएका लम्कीकै पुरुष र भारतबाटै फर्किएका कञ्चनपुरका अर्को पुरुषमा कोरोनाको संक्रमण पुष्टि भईसकेको छ। उनीहरु सबैको सेती प्रादेशिक अस्पतालमा उपचार भईरहेको छ।

उनि १३ दिन अघि कैलाली पुगेको खुलेको छ। पर्साको वीरगञ्जमा रहेकी ६० बर्षीय महिला चैत १७ गते लम्कीचुहा नगरपालिकाका लागि हिडेकी थिईन्। जिल्ला प्रहरी कार्यालय कैलालीका अनुसार उनी चैत १८ गते मात्र लम्की पुगेकी थिईन्।

त्यसपछि लम्की बहुमुखी क्याम्पसमा स्थापना गरिएको क्वारेन्टाईनमा राखिएको थियो। उनको चैत २५ गते काठमाडौँबाट आएको तालिम प्राप्त स्वास्थ्यकर्मीको टोलीले नमूना संकलन गरी परिक्षणका लागि लगिएको थियो।

¥यापिड टेष्ट गर्दा नेगेटिभ रिर्पोट आएपछि महिलालाई घर फर्काइँएको थियो। तर राष्ट्रिय जनस्वास्थ्य प्रयोगशालामा नमूना परिक्षण गर्दा पोजेटिभ देखिएपछि ती महिलालाई सेती प्रादेशिक अस्पतालको आईसोलेसन कक्षमा राख्न धनगढी ल्याईदैछ।