काठमाडाैं । रुसले आक्रमण गर्न सक्ने आशंकाको कारण पछिल्लो केही समययता निरन्तर युक्रेन संकट बढ्दै गएको छ।बेलायती विदेशमन्त्री लिज ट्रसले युक्रेनमाथि रुसले जुनसुकै बेला आक्रमण गर्न सक्ने बताएकी छिन्।
सरकारको एक आपतकालीन बैठकको अध्यक्षतापछि बोल्दै उनले रुसले कुनै पनि समयमा युक्रेनमाथि आक्रमण गर्न सक्ने चेतावनी दिएकी हुन्।उनले युक्रेनमा रहेका सबै बेलायती नागरिकलाई मुलुक छाड्न आग्रह गरेकी छिन्।
यद्यपि रुसका एक अन्तर्राष्ट्रिय मामिला अधिकारीले युक्रेनको सीमा क्षेत्रमा सैन्य अभ्यास हुनु कुनै ठूलो कुरा नभएको बताएका छन्।उनले यो नियमित अभ्यासको एक हिस्सा भएकाले आक्रमणको कुनै योजना नभएको पनि स्पष्ट पारेका छन्।
यसअघि पनि रुसले निरन्तर आक्रमणको कुनै योजना नरहेको बताउँदै आएको छ। साथै उसले पश्चिमा मुलुकले निरन्तर भ्रम फैलाइरहेको रुसको आरोप छ। रुसी अधिकारीले आफूहरुले युद्ध सुरु नगर्ने तर त्यसको अन्त्य भने गर्ने चेतावनी दिएका छन्।
बेलायती विदेशमन्त्री ट्रसले रुसले युक्रेनमाथि आक्रमण गरे उसले गम्भीर परिणामको सामना गर्नुपर्ने चेतावनी दिएकी छिन्। गत साता बेलायती विदेशमन्त्रीले रुसी समकक्षीसँग पनि वार्ता गरेकी थिइन्।
उक्त वार्तामा भएको कुरामा रुस सन्तुष्ट नभएको ट्रसको भनाइ छ। अहिलेसम्म विश्वका १० भन्दा धेरै मुलुकले आफ्ना नागरिकलाई युक्रेन छाड्न निर्देशन दिइसकेका छन्।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
