एजेन्सी / काठमाण्डौ । चीनले निर्माण गरेको विश्वकै दोस्रो ठूलो जलविद्युत् आयोजनाले परीक्षण उत्पादन सुरु गरेको छ । याङ्सी नदीको सहायक नदीका रूपमा रहेको जिन्सा नदीमा निर्माण गरिएको बाइहिटान बाँधबाट विद्युत् उत्पादन हुन थालेको समाचार संस्था एपीले जनाएको छ ।
आयोजनाको उत्पादन क्षमता १६ हजार मेगावाट रहेको छ । जैविक इन्धनको खपत कम गरी वैकल्पिक र जलविद्युत् उत्पादनमार्फत विद्युतको माग पूरा गर्ने चीनको योजनाअनुसार चीनमा ठूला जलविद्युत् गृहहरू निर्माण भइरहेका छन् ।
चीनले चिनियाँ कम्युनिस्ट पार्टी स्थापनाको सयौँ वार्षिक उत्सव मनाउन लाग्दा आयोजनाको परीक्षण उत्पादन सुरु गरेको हो । बाइहेटान बाँधको उचाइ दुई सय ८९ मिटर अग्लो हुनेछ र एक हजार मेगावाट क्षमताका १६ वटा विद्युत् उत्पादन जेनेरेटर जडान गरिएका छन् ।
विश्वकै ठूलो जलविद्युत् आयोजना थ्री गर्जेज पनि चीनमै छ । जसको उत्पादन क्षमता २२ हजार पाँच सय मेगावाट रहेको छ । यी दुवै विद्युत् आयोजना राज्य नियन्त्रित थ्री गर्जेज ग्रुप कर्पोरेशनले निर्माण गरेको हो ।
जलविद्युत् आयोजनाबाट समुदाय र खेतीपाती डुबानमा पर्ने तथा नदीको जैविकता विशृङ्खलित बनाउने, माछा र अन्य प्रजातिको अस्तित्वमा खतरा उत्पन्न हुने भन्दै विश्वका अन्य कतिपय देशले जलविद्युत् उत्पादनलाई त्याग्न थालेका बेला चीनले भने ठूला आयोजना निर्माणलाई जोड दिएको छ ।
बाइहेटान विद्युत् गृहबाट उत्पादित विद्युत् उत्पादन पूर्ण क्षमतामा हुन थालेपछि बर्सेनि दुई करोड टन कोइलाको खपत कम हुने चिनियाँ अधिकारीहरूले बताएका छन् ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
