कञ्चनपुरमा पनि मतदान कार्य जारी,मतदाता उत्साहित

कञ्चनपुर । कञ्चनपुरमा पनि मतदान कार्य जारी रहेको छ । आइतबार भइरहेको प्रतिनिधि सभा सदस्य तथा प्रदेश सभा सदस्य निर्वाचनको मतदान कार्यक्रम सबै मतदान केन्द्रहरूमा बिहान सात बजेदेखि सुरू भएको थियो । मतदान कार्यक्रम साँझ पाँच बजेसम्म जारी रहने छ । क्षेत्र नम्बर १ मा ९९ हजार १ सय १० कुल मतदाता रहेका छन् । उक्त क्षेत्रमा ५२ वटा मतदान स्थलमा रहेका ११९ वटै मतदान केन्द्रमा मतदान भइरहेको छ । मतदाताहरू मतदानका लागि उत्साहित देखिएका छन् ।

निर्वाचन क्षेत्र नम्बर २ मा ४३ मतदान स्थलमा ११८ मतदान केन्द्रहरूबाट मतदान कार्यक्रम जारी छ । उक्त क्षेत्रमा एक लाख ५ हजार ५ सय ७७ मतदाता छन् । त्यस्तै, कञ्चनपुर क्षेत्र नम्बर ३ मा ९७ हजार ८ सय २२ कुल मतदाता छन् भने उक्त क्षेत्रमा ३७ मतदान स्थलमा १०९ मतदान केन्द्र निर्धारण गरी मतदान कार्य भइरहेको छ । निर्वाचनलाई स्वच्छ, निष्पक्ष र भयरहित वातावरणमा सम्पन्न गर्नका लागि मङ्सिर १ गते राति १२ बजेदेखि मङ्सिर ४ गते राति १२ बजेसम्मका लागि नेपाल–भारत सीमा नाका समेत बन्द गरिएको छ । कञ्चनपुरको दक्षिणी र पश्चिमी सीमा भारतसँग जोडिएको छ ।

नेपाल प्रहरी, म्यादी प्रहरी, सशस्त्र प्रहरी र नेपाली सेना निर्वाचनको सुरक्षार्थ परिचालन भएका छन् । निर्वाचनलाई मर्यादित र भयरहित वातावरणमा सम्पन्न गर्न सबै संयन्त्र परिचालन गरिएको छ । मतदाताले सुरक्षित वातावरणमा ढुक्कसँग मतदान गर्न सक्ने गरी सुरक्षा व्यवस्था समेत कडा पारिएको कञ्चनपुर प्रशासनले जनाएको छ । प्रदेश र प्रतिनिधिसभा सदस्य निर्वाचनमा कञ्चनपुरका कुल ३ लाख २ हजार ५ सय ९ मतदाता मतदान गर्न योग्य छन् । प्रतिनिधि सभाका ३ र प्रदेश सभाका ६ निर्वाचन क्षेत्र रहेको कञ्चनपुर जिल्लामा १ सय ३२ मतदान स्थल र ३ सय ४६ मतदान केन्द्र तोकिएको जिल्ला निर्वाचन कार्यालय कञ्चनपुरले जनाएको छ ।