काठमाडाैँ । राष्ट्रपति विद्यादेवी भण्डारीले उँधौली पर्वका अवसरमा स्वदेश र विदेशमा रहेका सम्पूर्ण नेपालीलाई शुभकामना दिएकी छिन् । यस अवसरमा आज (आइतबार) शुभकामना सन्देश दिँदै उनले सम्पूर्णमा सुख, शान्ति, सुस्वास्थ्य र दीर्घायूको कामना पनि गरेकी छिन् ।
‘ऋतु परिवर्तनको प्राकृतिक चक्र सँगसँगै आफ्नो जीवनचर्यालाई एकाकार बनाउन अभ्यस्त प्रकृति र पितृपूजक किरात समुदायको यो चाडले हाम्रो मौलिक सांस्कृतिक परम्परालाई समृद्ध तुल्याएको छ,’ सन्देशमा उल्लेछ छ, ‘यस उँधौली पर्वले मानव जीवन र प्रकृतिबीचको अन्योन्याश्रित सम्बन्धलाई उजागर गर्दै मानव जातिको अस्तित्वको निरन्तरताका लागि प्रकृति र वातावरण संरक्षण अपरिहार्य रहेको सन्देशसमेत दिएको छ भन्ने मलाई लागेको छ ।’
किरात समुदायका राई, लिम्बू, सुनुवार र याख्खाहरूको महान् चाड उँधौली पर्व हरेक वर्ष मङ्सिर पूर्णिमाका दिन सुरु हुन्छ र १५ दिनसम्म मनाइन्छ । यस अवसरमा किरात युवा र वृद्धवृद्धासमेत परम्परागत पहिरनमा ढोल र झ्याम्टाको तालमा सामूहिक रूपमा साकेला नृत्य गर्दै रमाइलो गर्छन् ।
हिउँद सुरु भएपछि जाडो छल्न मानिस, जीवजन्तु तथा चराचुरुङ्गी लेकबाट उँधो अर्थात् बेँसीतिर बसाइँ सर्ने समयमा मनाइने भएकाले पनि यसलाई उँधौली पर्वका रूपमा लिइएको हो । नयाँ अन्नबाली पितृलाई चढाइ पितृपूजा गरिन्छ । राम्रो फसलका लागि भूमिप्रति आभार व्यक्त गर्दै अन्नको सह बसोस् भन्ने कामनासहित यसमा भूमिको पूजा गर्ने गरिन्छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
