धनकुटा / बालुवा लोड गरेर गन्तव्यतिर जाँदै गरेको हाइवा टिपर कोसी लोकमार्गअन्तर्गत धनकुटाको धनकुटा नगरपालिका–२ नागढुङ्गामा आज (शुक्रबार) बिहान दुर्घटनामा पर्दा दुई जनाको मृत्यु भएको छ ।
धनकुटाबाट तेह्रथुमको बसन्तपुरतिर जाँदै गरेको प्रदेश ०३–००१ क ०५४९ नम्बरको टिपर बिहान ४ः४५ बजेतिर दुर्घटना हुँदा टिपरका चालक र सहचालकको घटनास्थलमै मृत्यु भएको हो । धनकुटा ट्राफिक प्रहरी प्रमुख सइ (नायव निरीक्षक) लोकबहादुर दियालीका अनुसार मृतकमध्ये चालक भुवन मगरको मात्रै सनाखत भएको छ । मगरको ठेगाना लगायत विस्तृत विवरण खुल्न बाँकी छ ।
मृतकमध्ये सहचालकको पहिचान खुल्न सकिरहेको छैन । दुवै जनालाई टिपरले किचिरहेको अवस्थामा फेला पारिएको र शव बाहिर निकाल्ने प्रयास भइरहेको जानकारी सइ दियालीले दिए । उनका अनुसार घुम्ती सडक पार गर्ने क्रममा टिपर आफै अनियन्त्रित भएर दुर्घटनामा परेको अनुमान गरिएको छ ।
बालुवा लोड गरिएको टिपर सडकबाट लगभग २५ मिटर तल खसेको अवस्थामा फेला परेको छ । घटनास्थलबाट टिपरलाई बाहिर निकाल्ने प्रयास भइरहेको प्रहरीले जनाएको छ । दुर्घटनाको विस्तृत विवरण प्राप्त हुन बाँकी छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
