काठमाडाैं । लिपुलेक, लिम्पियाधुरा र कालापानी क्षेत्रमा सडक निर्माण गरिरहेको सम्बन्धमा आफ्नो धारणा नेपाल सरकारलाई जानकारी गराइसकेको भारतले बताएको छ ।
काठमाडौँस्थित भारतीय दूतावासले आज (शनिबार) विज्ञप्ति जारी गरी आफ्नो धारणाबारे जानकारी गराएको हो । दूतावासका प्रवक्ता नवीन कुमारले सीमा सम्बन्धमा आफ्नो सरकारको धारणा यथावत् रहेको जनाएका छन् ।
भारतीय प्रधानमन्त्री नरेन्द्र मोदीले लिपुलेकमा सडक विस्तार गरिरहेको बताएपछि नेपालमा आलोचना भएको छ । उत्तराखण्डमा पुस १५ मा नेपाल हुँदै मानसरोवर जाने बाटो निर्माण गरिरहेकोबारे मोदीले बोलेपछि उनको अभिव्यक्तिमा आलोचना भएको हो ।
सत्तारुढ तथा प्रतिपक्षी दलले भारतसँग कूटनीतिक संवाद गर्न र सडक विस्तार तत्काल रोक्न सरकारलाई आग्रह गरेका छन् ।
भारत सरकारको धारणामा स्थापित अन्तर–सरकारी संयन्त्र र माध्यमहरूबाट सबैभन्दा उपयुक्त रूपमा सञ्चार र संवाद गर्न सकिने विज्ञप्तिमा उल्लेख छ ।
‘भारत–नेपाल सीमामा भारत सरकारको अडान यथावत् र स्पष्ट छ । नेपाल सरकारलाई जानकारी गराइसकेको छ,’ विज्ञप्तिमा उल्लेख छ, ‘पारस्परिक रूपमा सहमति भएका जुन सीमा समस्या बाँकी छन्, घनिष्ठ र मैत्रीपूर्ण द्विपक्षीय सम्बन्धको भावनामा आधारित रहेर ती समस्या सम्बोधन गर्न सकिन्छ ।’
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
