काठमाडौं । सत्ता गठबन्धनले संसदमा एमसीसी टेबल गर्ने निणर्यसँगै आइतबार नयाँ बानेश्वर क्षेत्र रणभूमि जस्तै बन्यो । प्रदर्शनकारीहरुले प्रहरीमाथि ढुङ्गामुढा हाने । प्रहरीले आत्मरक्षाका लागि रबरको गोली समेत प्रहार गरेको पाइएको छ ।
यसैबीच सरकारको तर्फबाट सञ्चार तथा सूचना प्रविधि मन्त्री ज्ञानेन्द्र कार्कीले संसदमा एमसीसीसम्बन्धी प्रस्ताव पेस गरेका छन् । संसदमा एमसीसी टेबल हुँदै गर्दा बानेश्वर क्षेत्र तनावग्रस्त बनेको थियो । प्रहरी र प्रदर्नकारीबीच दोहोरो भीडन्तको अवस्थामा समेत पुगेको थियो । भीडन्तलाई साम्य पार्न पानीको फोहोरा बर्साउनुको साथै बेला बेला प्रहरी ’ब्याक’ समेत भएको थियो ।
एमसीसी संसदमा पेश गर्दा समर्थन जनाएकै दलहरुले सडकमा भने बबाल मच्चाएका छन् । एमसीसी सम्झौता सदनमा लैजान समर्थन गरेका सत्ता साझेदार नेकपा माओवादी केन्द्र र नेकपा एकीकृत समाजवादीकै कार्यकर्ताले नयाँबानेश्वरको सडकमा उग्र प्रदर्शन गरे ।
त्यसक्रममा प्रहरीसँग झडप हुँदा माओवादीनिकट अखिल क्रान्तिकारीका अध्यक्ष पञ्चा सिंह पनि घाइते भएकी छन् । झडपका क्रममा प्रहरीले कयौं सेल अश्रुग्यास हानेको थियो । प्रदर्शनकारीहरू निषेधित क्षेत्र तोड्दै संसद भवन क्षेत्रसम्म पुगेका थिए । त्यसक्रममा प्रहरीले लाठी चार्ज र अश्रुग्यास अनि पानीको फोहरा चलायो भने प्रदर्शनकारी ढुङ्गा, इँटा बर्साए ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
