काठमाडौं । राष्ट्रिय प्रजातन्त्र पार्टीका महामन्त्री डा. धवलशम्सेर राणाले भ्रष्ट शासकहरूले देशलाई खोक्रो बनाएको कारण विद्यमान व्यवस्थाबाट मुलुक बन्न र बच्न गाह्रो भएको बताएका छन् ।
भारतको मुम्बईमा उपचारको क्रममा रहेका राणाले वक्तव्य जारी गर्दै अब तमाम राष्ट्रवादी, प्रजातन्त्रवादी, हिन्दूवादी र राजसंस्थावादीहरू एकजुट भएर मुलुक जोगाउने आन्दोलन गर्नुको विकल्प नभएको बताएका छन् । राणाले भनेका छन्, ‘भ्रष्ट व्यवस्था र शासकहरूले देशलाई खोक्रो पारिसकेका छन् । यो बेलामा सबै शक्तिहरू एक ठाउँमा आएर मुलुक जोगाउन आन्दोलन गर्न ढिलाई गर्नु हुँदैन ।
तमाम राष्ट्रवादी, प्रजातन्त्रवादी, हिन्दूवादी, राजावादीहरू चुप लागेर मुकदर्शक भएर बस्नु हुँदैन । अहिलेको व्यवस्था र प्रणालीबाट मुलुक बन्न पनि सक्दैन र बच्न पनि निकै गाह्रो छ ।’ दिनप्रतिदिन मुलुक समस्याको चक्रब्यूहमा भासिँदै गएको उनको भनाई छ । राणाले थपे, ‘सरकार राष्ट्रिय मुद्दा र समस्याहरूमा केन्द्रीत हुनुको सट्टा व्यक्तिगत प्रतिशोध साँध्न व्यस्त छ ।’ समान विचार भएका दल, संघ, संगठन, अभियान, अभियन्ताहरूसँग वार्ता, छलफल गरी एकतावद्ध भएर अघि बढ्ने वातावरण राप्रपाले तत्काल निर्माण गर्नुपर्ने भन्दै उनले यसको अगुवाई राप्रपाले नै गर्नुपर्छ भने ।
राप्रपाको बस्न लागेको कार्यसम्पादन समिति बैठकमा यस विषयमा गम्भीर छलफल हुनुपर्ने राणाको सुझाव छ । उनले भने, ‘हामी फराकिलो ढंगले देशलाई केन्द्रमा राखेर बुद्धिमत्तापूर्वक अघि बढ्नुको विकल्प छैन । सानातिना कुरामा अल्झिने, पूर्वाग्रह र संकिर्णता बोक्ने छुट हामीलाई छैन । एकतावद्ध हुँदै अघि बढौं ।
हाम्रो विचार र बाटो नै मुलुकको लागि सुहाउँदो छ ।’ मुम्बईमा स्वास्थ्यलाभ गरिरहेका राणाले स्वास्थमा उल्लेखनीय सुधार आएको र अब चाँडै स्वदेश फर्कने बताएका छन् ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
