कोरोना लक्षण देखिएका कैलालीका ६ जना संक्रमित अस्पताल भर्ना

धनगढी । कोरोना लक्षण देखिएका कैलालीका थप ६ जना संक्रमित सेती प्रादेशिक अस्पताल भर्ना भएका छन्। आईतबार धनगढी र गौरीगंगाका ६ जना कोरोना संक्रमितमा लक्षण देखिएपछि अस्पतालको आईसोलेसन वार्डमा भर्ना गरिएको सूचना अधिकारी दिलिपकुमार श्रेष्ठले बताए।

शनिबार कोरोना संक्रमण पुष्टि भएका गौरीगंगा नगरपालिकाका १८, २६, २७ र ३३ वर्षीय पुरुषलाई आईसोलेसन वार्डमा भर्ना गरिएको उनले बताए। यस्तै लक्षण देखिएपछि धनगढी उप-महानगरपालिकाका दुईजनालाई पनि आईसोलेसन भर्ना गरिएको हो।

उपमहानगरपालिकाको वडा नम्वर १४ का २२ वर्षीय युवती र २६ वर्षीय युवकमा कोरोनाको लक्षण देखिएपछि आइतबार आइसोलेसन वार्डमा भर्ना गरिएको सूचना अधिकारी श्रेष्ठले जानकारी दिए ।

यसअघि प्रादेशिक अस्पतालले स्वास्थ्य मन्त्रालयले जारी गरेको निर्देशिका अनुसार लक्षण नभएको भन्दै दुवै संक्रमितलाई क्वारेन्टिनमा बस्नेगरी जेठ २३ गते फिर्ता पठाएको थियो।

स्वास्थ्य मन्त्रालयले जारी गरेको निर्देशिकामा लक्षण नभएका र सामान्य लक्षण देखिएका बिरामीलाई होम आइसोलेसनमा राख्ने उल्लेख भएपछि उनीहरुलाई फिर्ता पठाइएको सेती प्रादेशिक अस्पतालले जनाएको थियो।

तर अहिले लक्षण देखिएपछि सोही निर्देशिका अनुसार आइसोलेसनमा भर्ना गरिएको हो। यो सँगै सेती अस्पतालको आईसोलेसन वार्डमा उपचाररत व्यक्तिहरुको संख्या २५ पुगेको छ।

यसअघि १९ जना लक्षण देखिएका संक्रमितको सेतीमै उपचार भईरहेको थियो भने ६ जना लक्षण नदेखिएका संक्रमितलाई नयाँ निर्देशिका अनुसार डिस्चार्ज गरेको थियो।