बिराटनगर । प्रदेश १ सरकारले सोमबार आगामी आर्थिक वर्ष २०७७र७८ को लागि बजेट प्रदेशसभामा पेश गर्दैछ। आर्थिक मामिला तथा योजनामन्त्री इन्द्रबहादुर आङ्बोले ३ बजे बस्ने प्रदेशसभा बैठकमा बजेट पेश गर्नेछन्।
गत वर्ष ४२ अर्बको बजेट ल्याएको प्रदेश १ सरकारले चालु आर्थिक वर्षमा करिब ५ देखि ७ अर्ब घटाएर बजेट ल्याउने तयारी गरेको मन्त्रालय स्रोतले जनाएको छ।
अन्य प्रदेश भन्दा पूँजीगत खर्च धेरै भएको कारण प्रदेश सरकारको नगद मौज्दात कम हुने, प्रदेशको राजश्व प्रभावित भएको र संघीय सरकारबाट प्राप्त हुने बजेट पनि घटेकोले बजेटको आकार घट्ने भएको हो ।
प्रदेश सरकारले ल्याउन लागेको तेस्रो बजेट कोरोना भाइरसको महामारीले पारेको प्रभाव न्युनिकरण गर्ने लक्ष्यसहित स्वास्थ्य, कृषि र रोजगार क्षेत्रमा केन्द्रित हुने आर्थिक मामिला तथा योजनामन्त्री इन्द्रबहादुर आङ्बोले बताउँदै आएका छन्।
कुल बजेटको २० प्रतिशत स्वास्थ्य र २० प्रतिशत कृषिमा विनियोजन गर्ने तयारी सरकारको छ। स्रोतको संकुचन भएको र केन्द्रबाट प्राप्त हुने बजेट पनि घटेकोले यो वर्ष नयाँ आयोजना धेरै बजेटमा समावेश हुने छैनन्। प्रदेश सरकारले चालु आर्थिक वर्षमा सुरु गरेका वहुवर्षीय आयोजना र मुख्यमन्त्री ग्रामीण सडक योजनाको कामलाई सुनश्चितता दिनेगरी बजेट आउँदैछ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
