जानकी आँखा अस्पतालमा बर्सेनि १० हजारको शल्यक्रिया

१२ माघ, धनुषा ।  जनकपुरधाम स्थित जानकी आँखा अस्पतालमा बिरामीको चाप बढेको छ । नेपाल रेडक्रस सोसाईटीद्वारा संचालित जानकी आँखा अस्पतालमा सहज एवं सरल उपलब्धताबाट फेको शल्यक्रिया आँखाका बिरामीहरुको लागि आकर्षण बनेको हो ।

भारतमा अत्याधिक महंगो, निजी अस्पताल, काठमाडौँमै पनि फेको सेवा लिन अत्यधिक खर्च बेहोर्न नसक्नेहरुको लागि जानकी आँखा अस्पताल राम्रो विकल्प बनेको छ । फेको शल्यक्रियाबाट आँखामा हुने मोतियाबिन्दुको उपचार बिना चिरफार, अति नै सुक्ष्मयन्त्रबाट गरिने र आधा घण्टामा बिरामी निको भएर घर फर्किने हुनाले फेको प्रविधिमा आकर्षण बढेको अस्पतालका प्रशासन कायम–मुकायम प्रशासकीय अधिकृत दिपेन्द्र सिंहले बताए ।
उनले भने, ‘भारतीय बिरामीहरुलाई उता फेको प्रविधिबाट उपचार लिन सेवा नै उपलब्ध छैन, उपलब्ध भएको सेवामा समेत ५० हजार सम्म शुल्क लिईन्छ, तर यहाँ बिना घाउँ, सरल र सुलभ तरिकाबाट सर्जरी गरिने भएकोले बढी बिरामी आउँछन् ।’ भारतमा ५० हजार र जनकपुरमा मात्र १२ हजार नेपालीमा यो सेवा पाउने भएपछि भारतीय आँखा बिरामीहरु बढी आकर्षित भएर आउने गरेको छ । सिंहले काठमाडौँमा समेत यही सेवा लिन ३० हजार रुपैयाँ खर्चिनुपर्ने दाबी गरे ।

नेपालसँग छिमेकी रहेको भारतको बिहार, उत्तरप्रदेश, झारखण्ड, बंगाल सम्मका आँखा बिरामीहरु अस्पतालमा आउने गरेको र उनीहरुले नयाँ सेवा स्वरुप फेकोलाई सराहना गर्ने गरेको छन् । हाल प्रतिदिनको हिसावले २० देखि २५ जना बिरामीहरुलाई फेको माध्यमबाट शल्यक्रिया भइरहेको अस्पताल प्रशासनले जनाएको छ ।चिसो महिनामा आँखा शल्यक्रिया गराउंदा घाउँ नलाग्ने र छिटो निको हुने भएका कारण कात्तिक देखि फाल्गुन सम्म अस्पतालमा बिरामीहरुको संख्या ह्वात्तै बढ्ने गरेको नेत्र अधिकृत रुदल साहले बताए । अन्य सिजनहरुमा ३ देखि ५ सयको संख्यामा दैनिक बिरामीहरु आउने गरेपनि अहिले प्रतिदिन ५ देखी ७ सयको संख्यामा बिरामीको चाप रहने गरेको साह बताउँछन् ।

मोतियाबिन्दुको शल्यक्रिया गर्न जानकी आँखा अस्पतालमा ४ हजार ३ सय ८० रुपैंया शूल्क तिर्नुपर्ने हुन्छ । जसमा अस्ट्रेलियन प्रविधीबाट बनेको गुणस्तरीय लेन्स समेत दिइने हुनाले बिरामीहरुको संख्या बढि भन्दा बढि हुने गरेको छ । अझ गाउँघरमा सञ्चालन गरिने शिविरका बिरामीहरुलाई १ हजारमा सर्जरीसहित चस्मा र औषधि समेत प्रदान गरिँदै आएको शिविर संयोजक अजय कुमार झाले बताए । ‘कुनै संघसंस्था वा स्थानीय गाउँलेहरुले शिविर चलाएर आएका बिरामीहरुका लागि अझ सुलभ छ, एक हजारमै हामीले सर्जरी गरि सेवा प्रदान गर्छौ’, उनले भने । अधिकांश निजी क्लिनिक वा अस्पतालहरुमा बढि रकम लिने गरिएको र गुणस्तरहीन लेन्स लगाउने गरिएकोले बिरामीहरुको विश्वास अस्पताल प्रति बढ्दै गएको भारतबाट आँखाको अप्रेशन गराउन आएका मधुवनीका ५० वर्षीय विकास पजियारले बताए ।

नेपाल रेडक्रस सोसाईटी क्षेत्रीय आँखा अस्पताल कार्यक्रम अन्तर्गत जनकपुरमा सन २०१५ मा ओपिडिमा १ लाख २ हजार ३ सय ३० र शल्यक्रियामा ७ हजार ७ सय ८१, २०१६ मा १ लाख ४ हजार ३ सय १५ ओेपीडीमा र १० हजार २ सय ७१ शल्यक्रियामा भएको अस्पताल प्रशासनले जनाएको छ । २०१७ मा ओपिडी तर्फ १ लाख ५ हजार ३ सय १० र सर्जरीमा ८ हजार ९ सय, २०१८ मा १ लाख १२ हजार, शल्यक्रियामा ९ हजार ४ सय ५० र २०१९ मा ओपिडी तर्फ १ लाख १७ हजार १ सय ७२ मा ८ हजार ९ सय ५३ जनाको शल्यक्रिया गरिएको अस्पताल प्रशासनले जनाएको छ । जस मध्ये ४० प्रतिशत भारतीय आँखाको बिरामी आउने गरेको तथ्याङ्कले देखाउँछ ।