काठमाडौं । सुदूरपश्चिममा १६ लाखभन्दा बढी मतदाता छन्। यिनै मतदाताले आगामी नेतृत्वका लागि जनप्रतिनिधि चुन्नेछन्। तर स्थानीय तह निर्वाचनमा ठूलो जनसंख्या मतदान गर्नबाट वञ्चित हुने देखिएको छ। झण्डै ७ लाखको हाराहारीमा भारतका विभिन्न सहर र २ लाख २६ हजार वैदेशिक रोजगारीको शिलशिलामा विभिन्न मुलुक पुगेकाहरुले आफ्नो मतको प्रयोग गर्न नपाउने भएका हुन्।
हरेक नागरिकलाई मताधिकारको अधिकार भएपनि वैदेशिक रोजगारीमा जानेहरुका लागि ऐन र कार्यविधि नभएका कारण समस्या भएको राष्ट्रिय मानव अधिकार आयोग सुदूरपश्चिमका प्रमुख मोहनदेव जोशीले बताए। यस्तै मतदानको क्रममा खटिने कर्मचारी, सुरक्षाकर्मी र निजामति कर्मचारी, अन्य जिल्लामा कार्यरत संचारकर्मीले समेत गरी हजारौँ मतदान गर्नबाट बञ्चित हुने देखिएको छ।
सोही कारण स्थानीय तहको निर्वाचनमा शतप्रतिशत मतदाता उपस्थित हुन्छन् भन्ने बलियो आधार समेत छैन। सरकारले सबै नागरिकलाई मताधिकार प्रयोगको व्यवस्था गर्न अझै सकेको छैन। स्थानीय तहको निर्वाचनमा आफ्नो मताधिकार प्रयोग गर्नबाट लाखौँको संख्यामा मतदाता वञ्चित हुनु लोकतन्त्रको लागि राम्रो सन्देश नभएको सरोकारवालाहरुको बुझाइ छ ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
