काठमाडौं । काठमाडौंमा मनसुन सुरु भएयताकै सबैभन्दा गर्मी आइतबार भएको छ ।
काठमाडौंमा आइतबारको अधिकतम तापक्रम ३२ दशमलव ३ डिग्री सेल्सियस पुगेको थियो । हिजो आइतबार यसपालि मनसुन लागेपछिकै सबैभन्दा धेरै गर्मी भएको मौसमविद् हिरा भट्टराईले जानकारी दिए । पानी नपर्दा काठमाडौंसहित देशभर नै गर्मी बढिरहेको छ । अहिले भने काठमाडौंसहित वाग्मती, प्रदेश-१ र गण्डकी प्रदेशका केही ठाउँमा शीतल छ ।
हिजोअस्ति बिहानै घाम चर्किने गरे पनि यी प्रदेशका केही ठाउँमा आज बिहान हल्का पानी पर्नुका साथै मौसम आंशिकदेखि सामान्य बदली भएकाले केही शीतल भएको हो । तर, केही समयमा फेरि बादल हटेर घाम लाग्ने सम्भावना रहेको मौसमविद् भट्टराईले बताए उनका अनुसार उपत्यकासहित केही ठाउँमा लागेको बादल केही घण्टामा हटेर फेरि घाम चर्किने सम्भावना छ । यसले गर्दा अहिले शीतल भए पनि गर्मी फेरि बढ्ने अनुमान छ ।
वाग्मती, गण्डकी र प्रदेश-१ को मौसम आंशिकदेखि सामान्य बदली भए पनि अन्य प्रदेशमा भने बिहानैदेखि घाम चर्किएको छ । गर्मीका कारण तराईका जिल्लाको जनजीवन बढी प्रभावित भइरहेको छ । तराइका जिल्लामा चर्को घाम र गर्मीले दिउँसोको समयमा घरबाट बाहिर निस्कनै मुस्किल भएको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
