मास्कमा कालो बजारी, सरकार भने मौन

काठमाण्डौं । कोरोना भाइरसको त्रास फैलिएसँगै बजारमा मास्क, स्यानिटाइजर लगायतका सामाग्रीहरुको कालोबजारी हुन थालेको छ। बजारमा यी सामाग्रीहरु पाइन छाडेका छन। पाइए पनि सामान्य भन्दा बढी मूल्य तिर्न उपभोक्ताहरु बाध्य छन्।

तीन साता अघिसम्म प्रति गोटा ५ रूपैयाँ पर्ने मास्कको मूल्य कम्तिमा चार गुना बढेर २० देखि २५ रूपैयाँ प्रति पिस पुगेको छ। १० रूपैयाँ पर्ने मास्कको मूल्य ५० रूपैयाँ पुगेको छ। त्यतिमै बिक्री गरिरहेका खुद्रा व्यापारी अब थोक बजारमै अभाव भइसकेको बताउँछन्।

एउटा डिब्बाको ३ सयदेखि ५ सय रुपैयाँ पर्ने सामान्य सर्जिकल मास्क यतिबेला सजिलै पाइँदैन, पाइहाले १७०० देखि दुई हजार रूपैयाँसम्म परिरहेको खुद्रा व्यवसायीहरु बताउँछन्। उता माक्स उत्पादन कम्पनीमा भने जति पनि माक्स भएको कम्पनीको भनाइ छ । तर, बजारमा भने माक्स छैन भन्दै उपभोक्तालाई फर्काइन्छ ।

औषधी पसलमा औषधी, माक्स लगायत सामाग्री किन्दै गरेकी कौसीला तामाङ भन्छीन, ‘औषधी पसलेहरु सुरुमा त माक्स छैन भन्छन् यदि छ भनेपनि महंगो मुल्य भन्छन् । मलाई पनि सुरुमा ममाक्स नै छैन बजारमा भनियो, फेरी कतै बाँकी छ की हेरत भन्दै खोजे जस्तो गर्दै दिइयो तर, एउटै माक्सको २० रुपैया अरे । कोले लिन्छ मत लिदिन कपडाको माक्स किन्छु । सफा गरेर फेरी प्रयोग गर्न पनि त हुन्छ ।’

कौसीलाले भने झै अधिकांश उपभोक्ताहरुको गुनासो यहि छ । हुँदा हुँदा औषधि पसलेले समान्य रुघा खोकी लाग्दा, जरो आउँदा प्रयोग हुने पारा सिटामोल, काल बच्चाका लागि प्रयोग हुने औषधी समेत सकिएको छ भन्न थालेका छन् ।

बजारमा औषधि पसलेले मनपरी गरिरहदा सरकारको भने यस तर्फ ध्यान गएको देखिदैन । उपभोक्ताले कहाँ कसरी दुख पाइरहेको छ , त्यसका लागि कसरी सहज बातावरण बनाउन सकिन्छ भन्ने तिर सरकारको ध्यान नगएको उपभोक्ताको गुनासो छ ।

उपभोक्ता भन्छन्, सरकारले औषधी पसलमा मात्रै होइन खाद्यान्न लगायतका पसलमा पनि अनुगमन गरेर उपभोक्तालाई दैनिक उपभोग्य समान खरिद गर्दा ठगीनबाट जोगाउन पर्छ ।