देशभर मनसुनी प्रभाव सक्रिय: केही स्थानमा भारीदेखि अति भारी वर्षाको सम्भावना

सतर्कता अपनाउन आग्रह

उच्च पहाडी तथा हिमाली भूभागमा हिमपात र तराई क्षेत्रमा हुस्सु लाग्ने ।

काठमाडौँ । हाल देशभर मनसुनी वायुको प्रभाव सक्रिय रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा नेपालको पश्चिमी भूभागमा सरदरभन्दा केही उत्तर (नेपाल नजिक) तथा पूर्वी भूभागमा सरदर स्थानको आसपास अवस्थित छ।

​अहिले कोशी र लुम्बिनी प्रदेशका सबै भाग तथा बागमती, गण्डकी, कर्णाली र सुदूरपश्चिम प्रदेशका हिमाली एवं पहाडी भूभागमा साधारणतया बदली (आकाशमा बादल) रहेको छ। यस्तै, मधेस प्रदेशलगायत बागमती, गण्डकी र सुदूरपश्चिम प्रदेशका तराई क्षेत्रमा आंशिक बदली लागेको छ भने कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा हल्कादेखि मध्यम वर्षा भइरहेको छ। ​महाशाखाका अनुसार आज दिउँसो देशभर साधारणतया बदली रहनेछ।

हिमाली भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ भने पहाडी भागका धेरै स्थानमा मध्यम वर्षा हुन सक्नेछ। साथै, कर्णाली प्रदेशको पहाडी भूभागका साथै लुम्बिनी र सुदूरपश्चिम प्रदेशका पहाडी तथा तराई भूभागका एक–दुई स्थानमा भारी वर्षाको समेत सम्भावना रहेको छ।

​आज राति पनि देशभर साधारणतया बदली कायम रहनेछ। हिमाली भागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ भने मुलुकका पहाडी भूभागका साथै बागमती, गण्डकी, लुम्बिनी र सुदूरपश्चिम प्रदेशका तराई क्षेत्रका धेरै स्थानमा मेघगर्जन/चट्याङसहित मध्यम वर्षा हुनेछ।

मधेस र कोशी प्रदेशका तराई भागका केही स्थानमा पनि मध्यम वर्षाको आकलन गरिएको छ। विशेषगरी कोशी, बागमती र गण्डकी प्रदेशका हिमाली तथा पहाडी भाग, कर्णाली प्रदेशको पहाडी भाग तथा लुम्बिनी र सुदूरपश्चिम प्रदेशका पहाडी र तराई क्षेत्रका केही स्थानमा भारी वर्षा तथा एक–दुई स्थानमा धेरै भारी वर्षाको समेत सम्भावना रहेको विभागले जनाएको छ। ​

निरन्तरको वर्षाका कारण नदीनालामा पानीको बहाव बढ्ने, गेग्रान बहाव (डिप्री फ्लो), बाढी, पहिरो तथा भूक्षयको उच्च जोखिम रहने भएकाले ती क्षेत्रका बासिन्दालाई उच्च सावधानी अपनाउन महाशाखाले अनुरोध गरेको छ। यस मौसमी प्रणालीका कारण दैनिक जनजीवन, कृषि, स्वास्थ्य सेवा, पर्यटन, पर्वतारोहण तथा सडक र हवाई यातायात सेवा समेत प्रभावित हुन सक्ने भएकाले आवश्यक सतर्कता अपनाउन विभागले सबैमा अपिल गरेको छ।