काठमाडौँ । तीन वर्षीया बालिकाको अपहरण, शरीर बन्धक तथा कर्तव्य ज्यान मुद्दाका मुख्य प्रतिवादी प्रोग्रेस चौधरी भन्ने पुरगेश चौधरीलाई बारा जिल्ला अदालतले २० हजार रुपैयाँ धरौटीमा रिहा गर्न आदेश दिएको छ।
न्यायाधीश प्रकाशकुमार अधिकारीको इजलासले बिहीबार मुख्य प्रतिवादी चौधरीलाई मुलुकी फौजदारी कार्यविधि संहिता, २०७४ को दफा ६७ र ७२ बमोजिम २० हजार रुपैयाँ नगद धरौटी वा सो बराबरको जमानत बुझाउन आदेश दिएको हो। तोकिएको धरौटी वा जमानत दिन नसकेमा निजलाई कानुन बमोजिम पुर्पक्षका लागि वीरगन्ज (पर्सा) स्थित कारागार कार्यालय पठाउन अदालतले निर्देश गरेको छ।
यसै मुद्दामा अभियोग लागेका अन्य प्रतिवादीहरू इन्द्रजित चौधरी, बबिता चौधरी, ममता चौधरी, पुष्पा चौधरी, नवीन विक, टेकबहादुर थापा मगर, शेष हसमुदिन आलम, सबिता चौधरी र विन्दु देवी चौधरीको हकमा भने तत्काल पर्याप्त प्रमाण नपुगेको ठहर गरिएको छ। अदालतले उनीहरूलाई मुलुकी फौजदारी कार्यविधि संहिता, २०७४ को दफा ६९ बमोजिम तारेखमा राखी पुर्पक्ष गर्न र दफा ७९ बमोजिम प्रक्रिया अघि बढाउन आदेश दिएको छ।
गत २०८३ साल साउन ३१ गते बिहान घर अगाडि खेलिरहेको अवस्थामा ३ वर्षीया बालिका हराएकी थिइन्। खोजतलासका क्रममा भदौ २ गते दिउँसो बाराको जितपुरसिमरा उपमहानगरपालिका–१ भक्तिनगर टोलस्थित वीरबहादुर रोक्काको खाली घरभित्र बालिका मृत अवस्थामा फेला परेकी थिइन्।
जाहेरी अनुसार मुख्य प्रतिवादी प्रोग्रेस चौधरीले विद्युतीय लाइन जडान गर्ने बहानामा बालिकालाई आफ्नो खाली घरमा लगेर जबरजस्ती करणी गरी क्रुरतापूर्वक हत्या गरेका थिए। अदालतले यस मुद्दामा फरार रहेका अन्य प्रतिवादीहरूका नाममा कानुनबमोजिम म्याद जारी गरी नियमानुसार पेस गर्न आदेश दिएको छ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
