पशुपतिनाथमा गैरहिन्दू प्रवेश प्रकरण: इटहरीबाट प्रियंका र ओसीम पक्राउ

​विराटनगर । पशुपतिनाथको मुख्य मन्दिर परिसरमा गैरहिन्दू प्रवेश गरेको घटनामा संलग्न रहेको आरोपमा इटहरीबाट दुईजना पक्राउ परेका छन्।

पक्राउ पर्नेमा इटहरीकी प्रियंका परियार र उनका पति ओसीम अन्सारी रहेका छन्। ​पशुपति क्षेत्र विकास कोषको जाहेरीका आधारमा प्रहरीले उनीहरूलाई इटहरीबाट नियन्त्रणमा लिएको हो।

पक्राउपछि उनीहरूलाई थप अनुसन्धान तथा कारबाहीका लागि प्रहरी वृत्त गौशाला पठाइएको छ। ​केही समयअघि प्रेम विवाह गरेका उनीहरू पशुपतिनाथ मन्दिर परिसरमा पुगेर भिडियो बनाएका थिए। उक्त भिडियोमा अन्सारीले मुस्लिम समुदायले लगाउने टोपी लगाएको देखिएपछि सो विषय सामाजिक सञ्जालमा भाइरल भएको थियो। भिडिओकै आधारमा सांसद खुस्वु ओलीले प्रतिनिधि सभाको बैठकमा समेत यस विषयमा प्रश्न उठाएकी थिइन्, पशुपति क्षेत्र विकास कोषले पनि उनीहरूलाई कानुनी कारबाही गर्नुपर्ने माग राखेको थियो।

संसदमा नै कुरा उठेपछि र सामाजिक सञ्जालमा चर्चा चुलिएपछि उनीहरूलाई पक्राउ गरिएको हो। ​प्रहरीसँगको बयानका क्रममा प्रियंका परियारले आफ्ना श्रीमानलाई पशुपतिनाथ मन्दिर लगेको स्वीकार गरेकी छन्। पशुपतिनाथ आफ्नो आस्थाको केन्द्र भएको बताउँदै उनले धार्मिक आस्थाको केन्द्रमा श्रीमानलाई सँगै लैजानुको कुनै गलत उद्देश्य नभएको स्पष्ट पार्दै यसलाई अन्यथा नबुझ्न आग्रह गरेकी छन्।

​पक्राउ परेका ओसीम अन्सारी इटहरी–८ का स्थायी बासिन्दा हुन् र उनी त्यहीँ व्यापार व्यवसाय गर्दै आएका छन्। घटनाबारे प्रहरीले थप अनुसन्धान अगाडि बढाएको छ।